وبلىس ورتالىعىن ارالاۋ بارىسىندا اباتتاندىرىلعان اۋلانى كورۋگە بارعان وبلىس اكىمى بالالار الاڭى ساپاسىز سالىنعانىن سىنعا الدى. الاڭنىڭ شەتىنە اينالدىرا تۇگەلدەي قيىرشىق قۇم-تاس توسەلگەن، قويىلعان ورىندىقتاردىڭ، ۋرنا تەمىرلەرىنىڭ ساپاسىزدىعى – وسىنىنىڭ ءبارى بالالاردىڭ الاڭسىز ويىنىنا، قاۋىپسىزدىگىنە لايىقتالماعان. قۇم توسەلگەن الاڭقاي دا قۇرىلىس نورمالارىنا ساي ەمەس. بالالار سىرعانايتىن، ورمەلەيتىن اتتراكسيوننىڭ ءوزى ەسكى نۇسقادا جاسالعان. وسىنداي ولقىلىقتارى كوزگە ۇرىپ تۇرعان اۋلانىڭ تۇرعىندارى دا بالالار الاڭىنىڭ جايسىز جاسالعاندىعىن ايتىپ، شاعىمدارىن جەتكىزدى.
ءوز كەزەگىندە وبلىس باسشىسى اۋلانى تۇگەلدەي قايتا جاساۋدى تاپسىردى. مەردىگەر كومپانيا جۇمىسىنىڭ ساپاسىن قاداعالاۋ قالا اكىمدىگىنە ەسكەرتىلدى.
جالپى تالدىقورعان قالاسىندا بۇگىندە 245 اۋلا بار. وتكەن جىلى 8 اۋلا اباتتاندىرىلىپ، وعان 187،4 ملن. تەڭگە بولىنسە، 2017 جىلى 13 اۋلاعا 211 ملن. تەڭگە قاراستىرىلعان.
الماتى وبلىسى اكىمدىگىنىڭ باسپا ءسوز قىزمەتى
