Saparbaev syilaǵan kólikti Aqsholaqov aýrýhanasyna tabystady
– Biz sizdermen maqtanamyz. Byltyr Elbasynyń jarlyǵyna sáikes, Serik Qýandyqulynyń «Eńbek eri» ataǵyna ie bolýy Aqtóbe úshin úlken abyroi, úlken bedel dep oilaimyn. Eń birinshi aqtóbelikterdiń, ekinshiden dárigerler qaýymynyń bedelin arttyrdy. Muny biz prezidenttiń meditsina salasyna qamqorlyǵy dep bilemiz, – dep atap ótti Berdibek Saparbaev.
Ákim meimandardyń meditsina qaýymdastyǵymen, stýdent jastarmen bolǵan kezdesýleriniń de mańyzy zor ekenin atap ótti.
– Ózderińiz bilesizder, byltyrdan bastap Aqtóbe óńirinde meditsina klasterin qalyptastyrsaq dep jumys istep jatyrmyz. Maqsatymyz – Aqtóbe neiginde Tóreǵali, Jaqsylyq, Serik sekildi osy óńirden shyqqan dárigerlerdiń bilimi men tájiribesin paidalanyp, Aqtóbeni batys óńiriniń ortalyǵy etip jasasaq. Sońǵy kezde óńirimizde meditsina salasy damyp keledi. Ózderińiz bilesizder, qai ýaqytta baýyrdy, búirekti aýystyrý operatsiiasy jasalyp edi. Júrekke qashan ota jasaldy? Osynyń barlyǵy sizderdiń eńbekterińiz, – dedi oblys basshysy.
Serik Aqsholaqov aýyldan jaiaý ketpesin degen tilekpen Berdibek Saparbaev aqtóbelikterdiń atynan kólik mingizetinin jetkizdi. Alaida, meiman temir tulpardy oblystyq jedel járdem aýrýhanasyna tabystady.
– Meniń osylai shalqyp júrýime aldymen osy eldiń azamattary zor yqpal etti. Áke-shesheme, aǵaiyndaryma alǵys bildiremin. Qara shańyraq – meditsina ýniversitetine basymdy iemin. Jaqsynyń jaqsylyǵyn ait, bizdi qoldap, shaqyrǵanyńyzǵa rahmet, atqa mingen azamatsyz, úkimette júrgende de meditsina salasyna erekshe den qoiatynsyz. Sizge densaýlyq tileimin, Berdibek Mashbekuly, – dedi Serik Aqsholaqov.
Meiman oblystaǵy jańadan boi kótergen meditsina mekemelerindegi sońǵy úlgidegi jabdyqtardy kórip tańqalǵanyn jasyrmady. Óńirde qolǵa alynyp jatqan bastamalarǵa sáttilik tiledi.
– Al, kólikti men oblystyq jedel járdem aýrýhanasynyń ujymyna tartý etkim keledi. «Týǵan jerim – tiregim» dep jatady ǵoi. Meniń tiregim osy oblystyq jedel járdem aýrýhanasy. Ótkende Qyzylorda oblysynyń Baiqońyrynda zymyrannyń aspanǵa ushqanyn kórdim. Meni de kótergen osy aýrýhana. Meniń Baiqońyrym osy, temir tulpardy osy mekemege atasam deimin, – dedi Shalqardan shyqqan, at álemge áigili neirohirýrg Serik Aqsholaqov.
Marat Tólepbergen, «Tilshi»
