بەردىبەك ساپاربايەۆتىڭ ارنايى شاقىرۋىمەن اقتوبەگە مەديسينا سالاسىنىڭ نارقاسقالارى تورەگەلدى شارمانوۆ، جاقسىلىق دوسقالييەۆ جانە تاياۋدا «ەڭبەك ەرى» اتاعىن العان سەرىك اقشولاقوۆ كەلدى، دەپ حابارلايدى «ءتىلشى». وبلىس باسشىسى مىڭداعان ادامعا ءومىر، دەنساۋلىق سىيلاعان دارىگەرلەرگە شاقىرتۋدى قابىل الىپ، مەرەكە قارساڭىندا ۋاقىت تاۋىپ اقتوبەگە كەلگەندەرى ءۇشىن العىسىن جاۋدىردى.

– ءبىز سىزدەرمەن ماقتانامىز. بىلتىر ەلباسىنىڭ جارلىعىنا سايكەس، سەرىك قۋاندىق ۇلىنىڭ «ەڭبەك ەرى» اتاعىنا يە بولۋى اقتوبە ءۇشىن ۇلكەن ابىروي، ۇلكەن بەدەل دەپ ويلايمىن. ەڭ ءبىرىنشى اقتوبەلىكتەردىڭ، ەكىنشىدەن دارىگەرلەر قاۋىمىنىڭ بەدەلىن ارتتىردى. مۇنى ءبىز پرەزيدەنتتىڭ مەديسينا سالاسىنا قامقورلىعى دەپ بىلەمىز، – دەپ اتاپ ءوتتى بەردىبەك ساپاربايەۆ.

اكىم مەيمانداردىڭ مەديسينا قاۋىمداستىعىمەن، ستۋدەنت جاستارمەن بولعان كەزدەسۋلەرىنىڭ دە ماڭىزى زور ەكەنىن اتاپ ءوتتى.

– وزدەرىڭىز بىلەسىزدەر، بىلتىردان باستاپ اقتوبە وڭىرىندە مەديسينا كلاستەرىن قالىپتاستىرساق دەپ جۇمىس ىستەپ جاتىرمىز. ماقساتىمىز – اقتوبە نەىگىندە تورەعالي، جاقسىلىق، سەرىك سەكىلدى وسى وڭىردەن شىققان دارىگەرلەردىڭ ءبىلىمى مەن تاجىريبەسىن پايدالانىپ، اقتوبەنى باتىس ءوڭىرىنىڭ ورتالىعى ەتىپ جاساساق. سوڭعى كەزدە وڭىرىمىزدە مەديسينا سالاسى دامىپ كەلەدى. وزدەرىڭىز بىلەسىزدەر، قاي ۋاقىتتا باۋىردى، بۇيرەكتى اۋىستىرۋ وپەراسياسى جاسالىپ ەدى. جۇرەككە قاشان وتا جاسالدى؟ وسىنىڭ بارلىعى سىزدەردىڭ ەڭبەكتەرىڭىز، – دەدى وبلىس باسشىسى.

سەرىك اقشولاقوۆ اۋىلدان جاياۋ كەتپەسىن دەگەن تىلەكپەن بەردىبەك ساپاربايەۆ اقتوبەلىكتەردىڭ اتىنان كولىك مىنگىزەتىنىن جەتكىزدى. الايدا، مەيمان تەمىر تۇلپاردى وبلىستىق جەدەل جاردەم اۋرۋحاناسىنا تابىستادى.

– مەنىڭ وسىلاي شالقىپ جۇرۋىمە الدىمەن وسى ەلدىڭ ازاماتتارى زور ىقپال ەتتى. اكە-شەشەمە، اعايىندارىما العىس بىلدىرەمىن. قارا شاڭىراق – مەديسينا ۋنيۆەرسيتەتىنە باسىمدى يەمىن. جاقسىنىڭ جاقسىلىعىن ايت، ءبىزدى قولداپ، شاقىرعانىڭىزعا راحمەت، اتقا مىنگەن ازاماتسىز، ۇكىمەتتە جۇرگەندە دە مەديسينا سالاسىنا ەرەكشە دەن قوياتىنسىز. سىزگە دەنساۋلىق تىلەيمىن، بەردىبەك ماشبەك ۇلى، – دەدى سەرىك اقشولاقوۆ.

مەيمان وبلىستاعى جاڭادان بوي كوتەرگەن مەديسينا مەكەمەلەرىندەگى سوڭعى ۇلگىدەگى جابدىقتاردى كورىپ تاڭقالعانىن جاسىرمادى. وڭىردە قولعا الىنىپ جاتقان باستامالارعا ساتتىلىك تىلەدى.

–  ال، كولىكتى مەن وبلىستىق جەدەل جاردەم اۋرۋحاناسىنىڭ ۇجىمىنا تارتۋ ەتكىم كەلەدى. «تۋعان جەرىم – تىرەگىم» دەپ جاتادى عوي. مەنىڭ تىرەگىم وسى وبلىستىق جەدەل جاردەم اۋرۋحاناسى. وتكەندە قىزىلوردا وبلىسىنىڭ بايقوڭىرىندا زىمىراننىڭ اسپانعا ۇشقانىن كوردىم. مەنى دە كوتەرگەن وسى اۋرۋحانا. مەنىڭ بايقوڭىرىم وسى، تەمىر تۇلپاردى وسى مەكەمەگە اتاسام دەيمىن، – دەدى شالقاردان شىققان، ات الەمگە ايگىلى نەيروحيرۋرگ سەرىك اقشولاقوۆ.

 

مارات تولەپبەرگەن، «ءتىلشى»