“Aqtóbe-Atyraý” tasjolyn salýda jergilikti qurylys materialyn paidalanyp, daiyndyqty kúsheitýdi qadaǵalaǵan oblys ákimi Berdibek Saparbaev orynbasarlaryna uiyqtamai jumys isteýdi tapsyrdy.
Aqtóbede kólik infraqurylymyn damytýǵa arnalǵan jiyn boldy. Jiyn kezinde óńir basshysy óz orynbasary Serik Tólenbergenovtiń jumysyn synady.
“Halyqaralyq áýejaiy bar Aqtóbede shetelge ushatyn eki ǵana áýe reisi bar. “Jumys kóp, al sen otyrsyń “uiyqtap”. Ázirge eshteńe jasap jatqan joqsyń. Uiyqtasań, uiyqtaityn jerge barasyń”, – dedi óńir basshysy.
Kúni keshe Saparbaev qolastyndaǵy sheneýnikter men mektep direktorlarynyń jumysyn synǵa alyp, ózin “patsha” sezinetin ákim-qaralardy ornyna qoiǵan edi.
Oblys ákimi byltyrǵy jyly óńirdegi áleýmettik-ekonomikalyq kórsetkishterdi taldaý barysynda «uiyqtap júrgen ákimderdi» syn sadaǵyna alǵan. Saparbaevtyń aitýynsha, aýyl ákimderi men mektep direktorlary ózderin «patsha» sezinedi.
«Bular ómir boiy osylai ákim bolamyn dep oilap júr. Men olarǵa únemi bul senderdiń ákeleriń satyp alyp bergen qyzmet emes dep eskertemin. Baiqap otyrsam, mektep direktorlary men aýyl ákimderi bas-basyna «han» bolyp alypty. Mektep pen aýyldy ózderiniń jeke menshigi dep oilaidy. Qazirgi zaman uiyqtaityn zaman emes. Ol ýaqyt áldeqashan ótip ketken», – degen edi Berdibek Saparbaev.
