Saparbaev baspen «jumys istemeitin» shendilerdi synady
– Myna dúnielerdi kórsetýge uialsańdarshy. Senderde oi joq pa? Baspen jumys istemeisińder, oilanbaisyńdar. Aýyl men qalada turǵyzylatyn bilim, mádeniet, densaýlyq saqtaý nysandarynyń ǵimaraty aýla ishindegi sarai siiaqty. Esh ideia joq, jobalaýshylardyń biliktiligi jetpeidi. Bolmasa ǵalamtordy qarańdar, – dedi Berdibek Saparbaev.
Aqtóbede 3 pen 6 jas aralyǵyndaǵy balalardy baqshamen qamtý 92 paiyzdy qurap otyr. Biyl búldirshinderdi mektepke deiingi uiymdarǵa ornalastyrýdy óńirde 97 paiyzǵa jetkizý kerek. Mundai tapsyrmany oblys ákimi Berdibek Saparbaev oblystyq bilim basqarmasynyń basshysy Sáýle Ómirbekovaǵa tapsyrdy.
– Eger biz memlekettik-jeke kásipkerlik júiesi boiynsha jumys jasasaq, búldirshinderdi balabaqshamen qamtýdy osy jyly 97-98 paiyzǵa deiin jetkizýmizge bolady. Aqtóbe qalasynan basqa, aýdandardyń barlyǵynda balalardy baqshamen 100 paiyz qamtamasyz etýge tolyq múmkindik bar. Ol úshin mektepterdi qarap, balalar sany esepke alynýy tiis. Keiin jospar qurylsyn. Muny men buǵan deiin de tapsyrǵanmyn. Alaida esh nátije joq, –deidi oblys ákimi Berdibek Saparbaev.
Biyl aimaqta 8500 balaǵa arnalǵan 20 mekteptiń qurylysyn bastaý josparlanǵan. Osy jyly 14 qurylys jumysy aiaqtalyp, altaýy 2018 jyly paidalanýǵa beriledi. Jańa mektepter boi kóterip, eskileri bos qalady. Óńir basshysy eski bilim mekemelerin jóndeýden ótkizip, odan ári balabaqsha retinde paidalanýdy tapsyrdy. Byltyr Aqtóbede 32 áleýmettik nysannyń qurylysy bastalyp, 23-i paidalanylýǵa berildi. 9 nysannyń qurylysy biyl jalǵasady. Al, barlyǵy 650 sharshy metr turǵyn úi beriledi.
