Jurt ony jýrnalist retinde tanidy.
Sandýǵashtyń áriptesi Bolat Abaǵannyń atap ótkenindei: "Almaty jáne Jetisý oblysyndaǵy qalyń el ádildik izdegende aldymen Sandýǵash Elýbaiqyzynyń aldyna barady".
Jetisý oblysy boiynsha №17 birmandattyq okrýgten QR Parlamenti Májilisi depýtattyǵynan úmitker retinde tirkelgen Sandýǵash Dúisenova Jańa Qazaqstan qabyrǵasyn qalaýǵa ázir ekendigin aitady.
Depýtattyq mindeti – halyqtyń muńyn muqtajyn, joǵyn bilikke jetkizý.
"Táýelsizdik alǵaly jýrnalistikanyń otymen kirip, kúlimen shyǵyp kelemin. Qarapaiym eldiń jaǵdaiyn, muń-muqtajyn bilikke jetkizý úshin barymdy saldym, talai taǵdyrǵa arasha tústim, shyndyqtyń saltanat qurýyna yqpal ettim! Aldaǵy kezde de osy baǵyttan jańylmaimyn, ustanymnan ainymaimyn", – deidi áriptesimiz.
Óńirdegi jýrnalister qaýymy Qańtardyń qasiretti kúni - Taldyqorǵannyń taǵdyry tálkekke túsip, iesiz qalǵan kezde Sandýǵash halyqtyń qatarynda bolyp, buzaqylarǵa toqtam aityp, tonaýshylarǵa tosqaýyl bolǵanyn aitady. Onyń alańdaǵy qirap jatqan eskertkishti túsirgen áigili sýreti áp-sátte álemdi sharlap, ýaqyt óte dúniejúzilik deńgeide moiyndalyp, arnaiy syilyqqa ie boldy.
Áriptesimizdiń pikirinshe ótken otyz jylda el ádildikten ábden kúder úzgen. Eski Qazaqstanda halyq quqyq qorǵaý organdarynan júregi shailyǵyp, sottan túńilip, bilikten teris ainalǵan.
"Tórtinshi biliktiń ókili retinde ádilet izdep eńirep júrgen eldiń janaiqaiyna joǵarynyń nazaryn aýdarý meniń eń basty – missiiam. Eger depýtat bolsam sózim ótimdirek, jumysym ónimdirek bolady. Bilikke Parlament tribýnasynda naqty talap qoiyp, ony oryndatýǵa tyrysamyn.
Halyq qazir qajyp júr. Joqshylyqtan yńyrshaǵy shyqqan halyqqa keregi - túzý turmys, jaqsy ailyq. Qoǵam belsendisi retinde eńbektegen baladan eńkeigen qartqa deiingi adamdardyń ál-aýqatyn jaqsartýǵa at salysamyn. Óitkeni, qoǵamdaǵy barlyq azamat jaqsy ómir súrýge laiyqty.
Zorlyq-zombylyqqa da qarsymyn. Ásirese bóbekterge qylmys jasaǵan aiypkerlerdi ólim jazasyn qoldanýyn talap etem.
Qoǵamdaǵy beibitshilik pen teńdik qazaqtyń pikirin eskerip qurylýyn talap etemin. Májiliske tilin jutqan depýtattardyń túkke keregi joq. Mundailardyń paidasynan ziiany kóp. Kerisinshe, oiy men tujyrymyn batyl aitatyn, dáleldei biletin, qarapaiym halyqtyń múddesin bárinen biik qoiatyn, tiisti tusta talap ete alatyn jandar kerek", – deidi Sandýǵash Dúisenova.
Májilis depýtattyǵyna kandidat áriptesimiz budan bólek turǵyndardyń bilimge, densaýlyq saqtaýǵa, ekonomikalyq resýrstarǵa qoljetimdiligin artyrý úshin kúresýge ýáde berdi.
* QR Parlamenti Májilisiniń depýtattyǵyna Jetisý oblysy №17-shi birmandatty sailaý okrýginen úmitker Sandýǵash Elýbaiqyzy Dúisenovanyń material aqysy respýblikalyq biýdjet esebinen tólendi
