"Samuryq-Qazyna" qorynyń basqarma tóraǵasy Nurlan Jaqypov qor qyzmetkerleriniń biznes-klass ushaqtarmen ushýyna qatysty túsinikteme berdi. Onyń aitýynsha, bul – korporativtik standartqa sai bekitilgen ereje, dep habarlaidy Dalanews.kz.
Jaqypov brifing barysynda ózi jeke biznes-djetterdi paidalanbaitynyn atap ótti.
"Men ádette Air Astana-men ushamyn. Bul – bizdiń portfeldik kompaniiamyz. Issaparlar kezinde delegatsiia quramynda bolamyn. Air Astana – ashyq kompaniia, sondyqtan Airbus ushaǵyn birden alyp, qalaǵan baǵytqa ushyrý múmkin emes. Munda ashyqtyq pen eseptilik joǵary deńgeide", – dedi ol.
Qor basshysy retinde ol biznes-klass qyzmetin paidalanatynyn rastady.
"Men biznes-klass ushý standartyn ustanamyn. Bul – bizde korporativtik ereje retinde bekitilgen. Ózderińiz biletindei, "Samuryq-Qazynanyń" sońǵy eseptik kezeńdegi tabysy 2 trillion 400 milliard teńgeni qurady. Sondyqtan biz belgilengen biýdjet sheginen shyqpaimyz dep oilaimyn", – dedi Nurlan Jaqypov.
