Jýyrda Nazarbaevtyń nemere inisi ári Kárim Másimovtyń orynbasary qyzmetin atqarǵan Samat Ábishke qatysty sot úkimi shyqty. Ol nebári 8 jylǵa shartty túrde sottaldy. Bul úkim qoǵamda belsendilerdiń de, qarapaiym azamattardyń da narazylyǵyn týǵyzǵany belgili.
Belgili jýrnalist, qoǵam belsendisi Dina Elgezek te bul sheshimdi "uiat tirlik" dep sanaidy, - dep habarlaidy Dalanews.kz.
"Shynyn aitqanda, eki jaqta teketires bar shyǵar. Qoǵamdaǵy úmitti solaiymen joiyp jiberdi. Kárim Másimov sottalady dedi. Onyń ózi sottalyp jatyr ma?! Serikjan Mámbetálinniń jaqynda jazǵan posty bar. "Shyn máninde zonada jatyr ma, basqa ma?" dep. Ishki ister ministri "ony kórsetpeimiz" deidi. Nege kórsetpeidi? Qai jerde otyr? Kórsin. Birinshiden, ol sabaq bolady", - dedi belsendi Barys Media-ǵa bergen suhbatynda.
Jýrnalistiń sózinshe, Samat Ábishtiń oqiǵasy Qazaqstanda áli de Nazarbaev yqpaly kúshti ekenin kórsetip otyr.
"Samat Ábishti Nursultan Nazarbaevtyń inisi bolǵannan keiin, birneshe jyl ótip ketkennen keiin, onda da Ysqaq degen azamat "Samat Ábishtiń buiryǵyn oryndadym" degen málimdeme jasady degen soń qylmystyq is qozǵaidy. Kárim Másimovtiń 4 birdei orynbasaryn 18 jylǵa deiin sottap jiberedi.
Al buǵan Bishimbaev siiaqty artyqshylyq (berildi - esk.), 8 jylǵa jai ǵana shartty túrde (sottady - esk.). Bul áli de Nazarbaevtyń yqpaly kúshti ekenin bildiredi", - dedi Dina Elgezek Barys Media-ǵa bergen suhbatynda.
Aita keteiik, Májilis depýtaty Ermurat Bapi 26 aqpanda Ulttyq qaýipsizdik komiteti tóraǵasynyń eks-birinshi orynbasary Samat Ábish jabyq sottyń sheshimimen 8 jylǵa shartty túrde sottalǵanyn málimdedi. Sonymen qatar, "DAT" insaiderlik aqparat kózine súienip, Ábishtiń general ataǵy men memlekettik marapattary alynǵanyn, biraq menshik-múlkine konfiskatsiia jasalmaǵanyn aitty.
"Soǵan qaraǵanda, múddeli bireýler "8 jyl" degen edáýir jazamen qoǵamdy aldarqatyp, al shyndyǵynda Samat Ábishti túrme jazasynan alyp qalǵan. Qańtar oqiǵasyna birden-bir kináli kúshtik qurylymnyń joǵary dárejeli laýazymgeri osylaisha tiisti jazadan qutyldy. Álbette, bul "komediianyń" basty rejisseri Nursultan Nazarbaev ekeni taiǵa tańba basqandai aian jaǵdai", - dedi sol kezde depýtat ta.
Artynsha Astana qalasynyń qylmystyq ister jónindegi aýdanaralyq soty Samat Ábishtiń úkimine qatysty pikir bildirdi. Sot Ábishke qatysty bilikti asyra paidalanǵany úshin úkim shyǵarǵan. "Qupiia" belgisin eskere otyryp, sot otyrystary jabyq formatta ótken.
Sotta prokýror aiypty qoldap, sottan Ábishti belgili bir laýazymdardy atqarý quqyǵynan 10 jylǵa aiyra otyryp, 8 jylǵa bas bostandyǵynan aiyrý jazasyn taǵaiyndaýdy suraǵan.
Sottalýshy kinásin tolyq moiyndap, shyn júrekten ókingen.
Keiin sot úkimimen Samat Ábish QR QK 362-babynyń 4-bóliginde kózdelgen qylmysty jasaǵany úshin kináli dep tanyldy jáne 10 jyl merzimge belgili bir laýazymdardy atqarý quqyǵynan aiyryla otyryp, 8 jylǵa bas bostandyǵynan aiyryldy.
Sot sottalýshynyń balalary baryn jáne onyń shyn júrekten ókingenin jazany jeńildetetin mán-jai dep tanydy.
