جۋىردا نازاربايەۆتىڭ نەمەرە ءىنىسى ءارى كارىم ءماسىموۆتىڭ ورىنباسارى قىزمەتىن اتقارعان سامات ابىشكە قاتىستى سوت ۇكىمى شىقتى. ول نەبارى 8 جىلعا شارتتى تۇردە سوتتالدى. بۇل ۇكىم قوعامدا بەلسەندىلەردىڭ دە، قاراپايىم ازاماتتاردىڭ دا نارازىلىعىن تۋعىزعانى بەلگىلى.
بەلگىلى جۋرناليست، قوعام بەلسەندىسى دينا ەلگەزەك تە بۇل شەشىمدى "ۇيات تىرلىك" دەپ سانايدى، - دەپ حابارلايدى Dalanews.kz.
"شىنىن ايتقاندا، ەكى جاقتا تەكەتىرەس بار شىعار. قوعامداعى ءۇمىتتى سولايىمەن جويىپ جىبەردى. كارىم ءماسىموۆ سوتتالادى دەدى. ونىڭ ءوزى سوتتالىپ جاتىر ما؟! سەرىكجان مامبەتاليننىڭ جاقىندا جازعان پوستى بار. "شىن مانىندە زونادا جاتىر ما، باسقا ما؟" دەپ. ىشكى ىستەر ءمينيسترى "ونى كورسەتپەيمىز" دەيدى. نەگە كورسەتپەيدى؟ قاي جەردە وتىر؟ كورسىن. بىرىنشىدەن، ول ساباق بولادى"، - دەدى بەلسەندى Barys Media-عا بەرگەن سۇحباتىندا.
ءجۋرناليستىڭ سوزىنشە، سامات ءابىشتىڭ وقيعاسى قازاقستاندا ءالى دە نازاربايەۆ ىقپالى كۇشتى ەكەنىن كورسەتىپ وتىر.
"سامات ءابىشتى نۇرسۇلتان نازاربايەۆتىڭ ءىنىسى بولعاننان كەيىن، بىرنەشە جىل ءوتىپ كەتكەننەن كەيىن، وندا دا ىسقاق دەگەن ازامات "سامات ءابىشتىڭ بۇيرىعىن ورىندادىم" دەگەن مالىمدەمە جاسادى دەگەن سوڭ قىلمىستىق ءىس قوزعايدى. كارىم ءماسىموۆتىڭ 4 بىردەي ورىنباسارىن 18 جىلعا دەيىن سوتتاپ جىبەرەدى.
ال بۇعان بيشىمبايەۆ سياقتى ارتىقشىلىق (بەرىلدى - ەسك.)، 8 جىلعا جاي عانا شارتتى تۇردە (سوتتادى - ەسك.). بۇل ءالى دە نازاربايەۆتىڭ ىقپالى كۇشتى ەكەنىن بىلدىرەدى"، - دەدى دينا ەلگەزەك Barys Media-عا بەرگەن سۇحباتىندا.
ايتا كەتەيىك، ءماجىلىس دەپۋتاتى ەرمۇرات باپي 26 اقپاندا ۇلتتىق قاۋىپسىزدىك كوميتەتى ءتوراعاسىنىڭ ەكس-بىرىنشى ورىنباسارى سامات ءابىش جابىق سوتتىڭ شەشىمىمەن 8 جىلعا شارتتى تۇردە سوتتالعانىن مالىمدەدى. سونىمەن قاتار، "دات" ينسايدەرلىك اقپارات كوزىنە سۇيەنىپ، ءابىشتىڭ گەنەرال اتاعى مەن مەملەكەتتىك ماراپاتتارى الىنعانىن، ءبىراق مەنشىك-مۇلكىنە كونفيسكاسيا جاسالماعانىن ايتتى.
"سوعان قاراعاندا، مۇددەلى بىرەۋلەر "8 جىل" دەگەن ەداۋىر جازامەن قوعامدى الدارقاتىپ، ال شىندىعىندا سامات ءابىشتى تۇرمە جازاسىنان الىپ قالعان. قاڭتار وقيعاسىنا بىردەن-بىر كىنالى كۇشتىك قۇرىلىمنىڭ جوعارى دارەجەلى لاۋازىمگەرى وسىلايشا ءتيىستى جازادان قۇتىلدى. البەتتە، بۇل "كومەديانىڭ" باستى رەجيسسەرى نۇرسۇلتان نازاربايەۆ ەكەنى تايعا تاڭبا باسقانداي ايان جاعداي"، - دەدى سول كەزدە دەپۋتات تا.
ارتىنشا استانا قالاسىنىڭ قىلمىستىق ىستەر جونىندەگى اۋدانارالىق سوتى سامات ءابىشتىڭ ۇكىمىنە قاتىستى پىكىر ءبىلدىردى. سوت ابىشكە قاتىستى بيلىكتى اسىرا پايدالانعانى ءۇشىن ۇكىم شىعارعان. "قۇپيا" بەلگىسىن ەسكەرە وتىرىپ، سوت وتىرىستارى جابىق فورماتتا وتكەن.
سوتتا پروكۋرور ايىپتى قولداپ، سوتتان ءابىشتى بەلگىلى ءبىر لاۋازىمداردى اتقارۋ قۇقىعىنان 10 جىلعا ايىرا وتىرىپ، 8 جىلعا باس بوستاندىعىنان ايىرۋ جازاسىن تاعايىنداۋدى سۇراعان.
سوتتالۋشى كىناسىن تولىق مويىنداپ، شىن جۇرەكتەن وكىنگەن.
كەيىن سوت ۇكىمىمەن سامات ءابىش ق ر قك 362-بابىنىڭ 4-بولىگىندە كوزدەلگەن قىلمىستى جاساعانى ءۇشىن كىنالى دەپ تانىلدى جانە 10 جىل مەرزىمگە بەلگىلى ءبىر لاۋازىمداردى اتقارۋ قۇقىعىنان ايىرىلا وتىرىپ، 8 جىلعا باس بوستاندىعىنان ايىرىلدى.
سوت سوتتالۋشىنىڭ بالالارى بارىن جانە ونىڭ شىن جۇرەكتەن وكىنگەنىن جازانى جەڭىلدەتەتىن ءمان-جاي دەپ تانىدى.
