3 qyrkúıekte Qazaqstannyń eks-prezıdenti Nursultan Nazarbaevtyń nemere inisi Qaırat Satybaldyuly bostandyqqa shyqty, - dep habarlaıdy Dalanews.kz.
Jýrnalıs Mıhaıl Kozachkovtyń sózinshe, Qaırat Satybaldyulyn Samat Ábish kútip alǵan.
Aıta keteıik, Samat Ábishtiń ózi 8 jylǵa shartty túrde sottalǵan bolatyn. Sot úkimimen Samat Ábish QR QK 362-babynyń 4-bóliginde (Bılikti nemese laýazymdyq ókilettikterdi asyra paıdalaný) kózdelgen qylmysty jasaǵany úshin kináli dep tanyldy. Sot jaza taǵaıyndar aldynda Samat Ábishtiń kishkentaı balalarynyń bolýyn jáne onyń shyn júrekten ókinýin eskergen. Al jazany aýyrlatatyn mán-jaılar anyqtalmapty.
Al Qaırat Satybaldy qalǵan 3 jyl, 3 aı jáne 7 kún jaza merzimin Almatyda probasıalyq baqylaýda bolyp óteıdi.
16 tamyzda Qaırat Satybaldyuly merziminen buryn bostandyqqa shyǵatyny belgili boldy. Onyń jazasyn shekteý sharasyna aýystyrý týraly ótinishi qanaǵattandyrylǵan.
Bul týraly Óskemen soty habarlady.
"Óskemen qalasynyń №2 soty sottalǵan Qaırat Satybaldynyń jazasynyń ótelmegen bóligin jazanyń neǵurlym jeńil túrine aýystyrý týraly ótinishhatyn qarady. Qaırat Satybaldy múlki tárkilenip, memlekettik qyzmet atqarý quqyǵynan 10 jylǵa deıingi merzimge aıyryla otyryp, 6 jylǵa bas bostandyǵynan aıyrylǵan bolatyn. Sottalǵan óziniń ótinishhatynda jazasynyń ótelmegen bóligin neǵurlym jeńil túrine aýystyrý týraly ótinishhatyn berý úshin zańnyń barlyq talaptaryn oryndaǵanyn atap kórsetken", - dep jazdy sot.
Al buǵan deıin májilis depýtaty Ermurat Bapı belsendi túrde aktıvterin qaıtaryp jatqan Qaırat Satybaldyuly bostandyqqa shyǵýy múmkin dep qaýiptenip, artynsha onyń boljamy oryndaldy.
