Qýandyq Bishimbaev sot otyrysynda Saltanattyń jaǵdaiy nasharlaǵanda aldymen jedel járdemge emes, balgerge habarlasqanyn aitty, - dep habarlaidy Dalanews.kz.
Búgingi sot otyrysy da Bishimbaevtan jaýap alýdan bastaldy. Onyń sózinshe, Núkenovanyń beti kógergenin kórgen sátte balgerge habarlasqan.
"Uiyqtap qaldyq, saǵat 13:30-da ony oiata bastadym. Ol oianǵan joq. Sol jaq betinde kógergen úlken iz bary jáne murny isigeni baiqaldy. Men qatty ýaiymdap kettim. Tanys balgerge qońyraý shaldym. Oǵan oianǵanbaǵanyn, kógergen jerin aittym. Ol 10 minýttan keiin qaita qońyraý shalýymdy ótindi. Men qaita qońyraý shaldym, ol "jai ǵana sharshaǵan" dedi. "Esin jiǵan soń úige baryńdar" dedi. Meniń júregim ornyna tústi", - dedi Bishimbaev.
Keiin ol Núkenovanyń jaǵdaiy jaqsarmaǵanyn kórip, Baijanovtan dári ákelýin ótingen. Artynsha jedel járdem shaqyrǵan.
"Men Baijanovqa jedel járdem shaqyr dedim. Ol jedel járdem shaqyrýǵa júgirip ketti. Jedel járdemge habarlasqanda, olar jasandy tynys aldyrý keregin aitty. Men oǵan jattyǵý jasai bastadym. Jaqyndap, onyń aýzyn ashqym keldi, biraq onyń jaǵy qarysyp qalǵan eken. Adam qaitys bolǵan kezde jaq súiegi qarysyp qalatynyn qaidan biletinim esimde joq. Ol kóz jumǵanyn túsindim, eseńgirep qaldym. Sodan keiin jedel járdem keldi, olar jansaqtaý sharalaryn jasady", - dedi Bishimbaev.
Bishimbaevtyń sózinshe, asúige baryp, pyshaq alyp, ózin óltirgisi kelgen.
"Men asúige baryp, pyshaq aldym. Bir ǵana oi boldy: óz-ózime qol jumsasam durys bolady dep oiladym. Keiin politsiia keldi. Mán-jai osylai boldy",- dedi Bishimbaev.
27 naýryzda eks-ministr Qýandyq Bishimbaevtyń isi boiynsha alqabiler tańdalǵan edi. Alqabiler alqasyna 12 adam irikteldi: 10 – negizgi quram, 2 – qosalqy. Sodan keiin ashyq sot otyrystary bastaldy.
Sonymen qatar, Qýandyq Bishimbaev sotta Saltanat Núkenovany asa qatygezdikpen óltirgenin moiyndamady. Bul oqiǵa 2023 jyly 9 qarashada Astana qalasyndaǵy BAU meiramhanasynda boldy.
Buǵan deiingi sózinde Bishimbaev dárethanada qandai oqiǵa bolǵanyn aitqan edi.
"Ol "maǵan bergen syilyqtaryńa ishiń ashityn shyǵar" dedi. "Olar maǵan nege kerek?" dedim. "Bárin qaitaramyn" dedi. "Qaitarýdyń qajeti joq, kerek bolmasa, laqtyryp tasta" dedim. Sol sátte oǵan ne bolǵanyn bilmeimin. Ol maǵan qarama-qarsy otyrdy. Meniń kózimshe syrǵasyn, neke júzigin, saǵatyn, bilezikterin sheshe bastady da, dárethanaǵa laqtyryp tastady. Bárin shyn júrekpen syilaǵanmyn. Men tańǵaldym, áreketterine qarap, sóilei almai qaldym. Ne isterimdi bilmedim. "Ishetin birdeńe ákeleiin" dep dárethanadan shyǵyp kettim. "Iá, alyp kel" dedi", - dedi ol.
Bishimbaevtyń aitýynsha, kelgen kezde esik jabyq ekenin kórgen.
"...Saltanat esikti ishten jaýyp alǵan, soqqynyń daýystary estilip jatty. Men esikti qaǵa bastadym. "Salta, Salta, esikti ash" dedim. Ol estimegen bolýy kerek. Men esikti judyryqpen soǵa bastadym. Ol júgirip kelip, esikti qaǵyp jatqanymdy estip, meni balaǵattai bastady. "Sen meni osyndai kúige jetkizdiń" dedi. Men túsinbedim. ...Mende de agressiia paida boldy. ...Men shtativti alyp, esikti ura bastadym. Sodan keiin esikte tesik paida boldy, keiin esikti ishten ashty. Ol meni balaǵattai bastady, men de ony boqtap aiǵailadym. Sóitip, janjal bastaldy, ol meni ura bastady, kóilegimdi jyrtyp jiberdi, men ony ustap alyp, iterip jiberdim, qabyrǵaǵa soǵyldy. "Sabyr saqta" dedim. Ol maǵan qaita kele jatqanda, men de onyń jeidesin jyrtyp jiberdim. Ol ashýlandy. Jeidesin sheship tastady. Onyń ústindegi kiimniń bári 8-i kúni tús kezinde kontsertke barar aldynda satyp alynǵan edi. Maǵan kiimderin laqtyra bastady. Men ony shapalaqpen uryp jiberdim, ol keiin shegindi. Bári óte tez boldy. Ol bir kezde "shalbarymdy da sheshemin" dedi. Men arqasynan ustap aldym", - dedi ol.
