«Kezbi» JShS-niń burynǵy basqarýshy direktory Erjan Kezbaev asa iri kólemdegi senip tapsyrylǵan qarajatty iemdendi jáne salyq tóleýden jaltardy degen aiyppen kináli dep tanyldy, dep habarlaidy Dalanews.kz Lada.kz-ke siltep.
2022–2023 jyldary Erjan Kezbaev «Ózenmunaigaz» AQ tarapynan uńǵymalardy kúrdeli jáne jerasty jóndeýge tartylǵan jumysshylardyń jalaqysyn tóleýge bólingen qarajattyń bir bóligin jeke maqsatta paidalanǵan. Kontrakttarda kózdelgen jalaqy tólemine arnalǵan jalpy somanyń 70 paiyzynan 2022 jyly tek 51,5%-yn, al 2023 jyly 57,7%-yn ǵana jalaqy retinde baǵyttaǵan. Qalǵan aiyrmashylyq – 1,45 milliard teńge – basqa maqsattarǵa jumsalǵan.
Sonymen qatar, Kezbaev basqaratyn kompaniia nóldik salyq deklaratsiialaryn tapsyryp, naqty kiristerdi jasyryp kelgen. Saldarynan memleketke salyq túrinde 1,57 milliard teńge kóleminde zalal kelgen.
Jalpy keltirilgen zalal – 3 milliard teńgeden astam.
Aiyptalýshy óz kinásin ishinara moiyndady, jáne 2023 jyly kásiporyn ereýilder men qarjylandyrýdyń bolmaýynan qiyn jaǵdaida bolǵanyn alǵa tartty.
Sot Erjan Kezbaevty 10 jylǵa bas bostandyǵynan aiyrdy. Sonymen qatar, oǵan 10 jyl merzimge munai-gaz salasyndaǵy basshylyq qyzmet atqarýǵa tyiym salyndy.
Sonymen birge:
«Ózenmunaigaz» AQ paidasyna – 321 million teńge;
Mańǵystaý oblysy boiynsha memlekettik kirister departamentiniń paidasyna – 1,5 milliard teńgeden astam qarajat óndiriletin boldy.
Mańǵystaý oblystyq sotynyń qylmystyq ister jónindegi sot alqasy bul úkimdi ózgerissiz qaldyrdy. Úkim zańdy kúshine endi.
