«كەزبي» ءجشس-نىڭ بۇرىنعى باسقارۋشى ديرەكتورى ەرجان كەزبايەۆ اسا ءىرى كولەمدەگى سەنىپ تاپسىرىلعان قاراجاتتى يەمدەندى جانە سالىق تولەۋدەن جالتاردى دەگەن ايىپپەن كىنالى دەپ تانىلدى، دەپ حابارلايدى Dalanews.kz Lada.kz-كە سىلتەپ.

2022–2023 جىلدارى ەرجان كەزبايەۆ «وزەنمۇنايگاز» اق تاراپىنان ۇڭعىمالاردى كۇردەلى جانە جەراستى جوندەۋگە تارتىلعان جۇمىسشىلاردىڭ جالاقىسىن تولەۋگە بولىنگەن قاراجاتتىڭ ءبىر بولىگىن جەكە ماقساتتا پايدالانعان. كونتراكتتاردا كوزدەلگەن جالاقى تولەمىنە ارنالعان جالپى سومانىڭ 70 پايىزىنان 2022 جىلى تەك 51،5%-ىن، ال 2023 جىلى 57،7%-ىن عانا جالاقى رەتىندە باعىتتاعان. قالعان ايىرماشىلىق – 1،45 ميلليارد تەڭگە – باسقا ماقساتتارعا جۇمسالعان.

سونىمەن قاتار، كەزبايەۆ باسقاراتىن كومپانيا نولدىك سالىق دەكلاراسيالارىن تاپسىرىپ، ناقتى كىرىستەردى جاسىرىپ كەلگەن. سالدارىنان مەملەكەتكە سالىق تۇرىندە 1،57 ميلليارد تەڭگە كولەمىندە زالال كەلگەن.

جالپى كەلتىرىلگەن زالال – 3 ميلليارد تەڭگەدەن استام.

ايىپتالۋشى ءوز كىناسىن ءىشىنارا مويىندادى، جانە 2023 جىلى كاسىپورىن ەرەۋىلدەر مەن قارجىلاندىرۋدىڭ بولماۋىنان قيىن جاعدايدا بولعانىن العا تارتتى.

سوت ەرجان كەزبايەۆتى 10 جىلعا باس بوستاندىعىنان ايىردى. سونىمەن قاتار، وعان 10 جىل مەرزىمگە مۇناي-گاز سالاسىنداعى باسشىلىق قىزمەت اتقارۋعا تىيىم سالىندى.

سونىمەن بىرگە:

«وزەنمۇنايگاز» اق پايداسىنا – 321 ميلليون تەڭگە؛

ماڭعىستاۋ وبلىسى بويىنشا مەملەكەتتىك كىرىستەر دەپارتامەنتىنىڭ پايداسىنا – 1،5 ميلليارد تەڭگەدەن استام قاراجات وندىرىلەتىن بولدى.

ماڭعىستاۋ وبلىستىق سوتىنىڭ قىلمىستىق ىستەر جونىندەگى سوت القاسى بۇل ۇكىمدى وزگەرىسسىز قالدىردى. ۇكىم زاڭدى كۇشىنە ەندى.