Almaty qalasynyń ákimdigi Saiyn kóshesindegi jol qozǵalysyn uiymdastyrýǵa engizilgen ózgeristerge qatysty turǵyndardyń pikirin eskerip jatqanyn málimdedi. Sondai-aq qaladaǵy ózge kóshelerde de birjaqty qozǵalysty engizý máselesi qaralyp jatqanyn habarlady. Bul týraly Dalanews.kz-tiń resmi saýalyna bergen jaýabynda aitylǵan.
Ákimdik málimetinshe, qazirgi ýaqytta mamandar birjaqty qozǵalysty ózge kóshelerde engizý múmkindigin jan-jaqty zerttep jatyr.
"Qaladaǵy basqa kóshelerde birjaqty qozǵalysty engizý máselesi qazirgi ýaqytta qaralý satysynda. Mamandar kóshe-jol jelisiniń geometriialyq parametrlerin, kólik aǵynynyń qarqyndylyǵyn jáne jol qozǵalysyn uiymdastyrýǵa yqtimal áserin eskere otyryp, keshendi taldaý júrgizýde. Taldaý nátijeleri boiynsha tiisti usynystar Almaty qalasy Politsiia departamentiniń Ákimshilik politsiia basqarmasyna kelisýge joldanady. Barlyq qajetti rásimder aiaqtalǵannan keiin túpkilikti sheshim qabyldanady", – dep jaýap berdi ákimdik.
Sonymen qatar Qalalyq mobildilik basqarmasy Saiyn kóshesindegi jańa qozǵalys syzbasyna qatysty turǵyndardyń pikirin jiti baqylap otyrǵanyn atap ótti.
"Jańa qozǵalys syzbasy engizilgen alǵashqy kúnderi belgili bir qolaisyzdyqtardyń týyndaýy múmkin ekenin túsinemiz. Alaida joba kezeń-kezeńimen iske asyrylyp jatqanyn jáne ony jetildirý jumystary áli de jalǵasyp jatqanyn eskerýlerińizdi suraimyz", - delingen jaýapta.
Ákimdiktiń aitýynsha, qazirgi ýaqytta jaiaý júrginshiler ótkelderin jańǵyrtý, baǵdarshamdardyń jumysyn retteý jáne qoǵamdyq kólikke basymdyq bere otyryp qozǵalys syzbasyn beiimdeý jumystary aiaqtalýǵa jaqyn.
"Barlyq jumys tolyq aiaqtalǵannan keiin ǵana qabyldanǵan sheshimderdiń tiimdiligine obektivti baǵa berýge bolady", - dep málimdedi basqarma.
Ákimdik kólik qozǵalysyna syrtqy faktorlardyń da áser etip otyrǵanyn jetkizdi. Atap aitqanda, Saiyn kóshesiniń jańa ýchaskesi ashylǵannan keiin tranzittik kólik aǵyny artqan. Budan bólek, irgeles kóshelerde injenerlik jelilerdi qaita jańartý jumystary júrgizilip jatqandyqtan, kólik aǵyndary ýaqytsha qaita bólingen.
Sondai-aq magistraldaǵy júktemeni azaitý maqsatynda 25 shildeden bastap kúndizgi ýaqytta júk kólikteriniń qozǵalysyna shekteý engizilgen.
"Bul shara kósheniń ótkizý qabiletin arttyrýǵa yqpal etedi dep kútilýde. Basqarma jol qozǵalysy jaǵdaiyn turaqty túrde baqylaýdy jalǵastyrady jáne qajet bolǵan jaǵdaida kólik taldaýy men naqty derekter negizinde qozǵalysty uiymdastyrýǵa tiisti túzetýler engizedi", - dep habarlady ákimdik.
Budan bólek, Jeltoqsan kóshesindegi qoǵamdyq kólikke arnalǵan arnaiy jolaq shtattyq rejimde jumys istep tur. Ákimdik aldaǵy ýaqytta bul ýchaskede qoǵamdyq kólik baǵyttarynyń sanyn kóbeitýdi josparlap otyrǵanyn málimdedi.
"Bul jolaýshylardyń jyldam ári jaily qatynaýyn qamtamasyz etip, qoǵamdyq kóliktiń basymdyqpen kedergisiz qozǵalýyna múmkindik beredi", - delingen resmi jaýapta.
Al Manas kóshesine qatysty qozǵalys syzbasyn ózgertý ázirge josparlanbaǵan. Ákimdik málimetinshe, ońtústik baǵyttaǵy birjaqty qozǵalys saqtalady, al Abai dańǵylynan Timiriazev kóshesine deiingi aralyqta júrgizilip jatqan ortasha jóndeý jumystary aiaqtalǵannan keiin de qozǵalysty uiymdastyrýdyń negizgi parametrleri ózgerissiz qalady.
