Keshe ǵana QR Prezidenti Nursultan Nazarbaev Aqparat jáne kommýnikatsiialar ministri Dáýren Abaevty qabyldaǵan kezde Parlament pen Úkimet otyrysy qazaq tilinde ótýi tiis ekenin aitqan bolatyn, dep habarlaidy Baq.kz tilshisi.
Memleket basshysy óz sózinde latyn álipbiine kóshýdiń tarihi turǵyda mańyzdylyǵyn atap ótti.
«Biz qazaq tiliniń mártebesin kóterý jumystaryn jalǵastyrýymyz kerek. Parlament pen Úkimet tek qazaq tilinde jumys isteýi tiis, biraq bul máselede azamattardyń quqyǵyna nuqsan kelmeýi kerek. Olar úshin sinhrondy aýdarma múmkindigin qarastyrý qajet», - dedi Prezident.
Búgin Úkimet otyrysynda alǵashqylardyń biri bolyp sóz alǵan Investitsiialar jáne damý ministri Jeńis Qasymbek pen Energetika ministri Qanat Bozymbaev baiandamalaryn tek qazaq tilinde jasady.
