«Búgin Almaty týǵan kúnin toilaýda. Bul ár adam úshin erekshe kún. Pandemiiaǵa qaramastan qala damyp keledi» dep jazdy Almaty ákimi.
Biyl 2,6 mln sharshy metrden astam turǵyn úi paidalanýǵa berilip, myńdaǵan almatylyq baspanaly bolady. Olardyń ishinde 248 myńnan astam nemese 4 926 páter halyqtyń áleýmettik osal tobyna beriledi. 1 013 kópbalaly, tolyq emes jáne múgedek balalardy tárbielep otyrǵan otbasylar turǵyn úige ie bolady.
Al jumys isteitin jastar úshin 1 050 jaldamaly páter qarastyrylǵan. «Almaty jastary» qalalyq baǵdarlamasy boiynsha – 1 000 jeńildetilgen nesie kózdelgen. Budan basqa jekelegen sanattar úshin «Shańyraq» baǵdarlamasy boiynsha bastapqy jarnany quiýǵa 1 mln teńgeden 2 myń turǵyn úi sertifikaty kózdelgen.
– Jyl sońyna deiin 16 myńǵa jýyq oqýshyny qamtityn 31 bilim berý nysanyn paidalanýǵa beremiz. 61 mektep janyndaǵy sport alańdaryn jańartýdamyz. 10 jabyq sport kesheni salynýda, – dep atap ótti megapolis ákimi.
Qalany kógaldandyrý baǵdarlamasy jalǵasýda. Osy jyldyń kókteminde 64 myń túp aǵash egiledi. Qazan aiynan bastap taǵy 350 myń aǵash otyrǵyzylady. 22 saiabaq pen skver jóndelip, jalpy aýdany 284 ga bolatyn 8 jańa saiabaq aimaǵynyń qurylysy bastaldy.
– Biz birge Almatyny ádemi, jaily ári ásem etip kórkeitemiz. Búgin ortaq igilik úshin eńbek etken árbir janǵa alǵys aitqym keledi! Barshańyzdy merekemen quttyqtaimyn! – dedi Baqytjan Saǵyntaev.
