Bilim ministrligi biryńǵai aqparattyq júie qurmaq. Bul júie ministrlik úshin de tiimdi, ári muǵalimderdiń jumysyn da aitarlyqtai jeńildetpek. Ministr Erlan Saǵadiev josparymen búgin úkimet otyrysynda bólisti.
"Biz aqparattyq júielerdi biriktirip, tártipke keltirip jatyrmyz. 73 aqparattyq bazamyz bar. Olar derekterdi 4 negizgi platformaǵa, atap aitqanda, ulttyq bilim berý derekter bazasy, elektrondy kúndelik, bultty býhgalteriia jáne joǵary bilimdi basqarýdyń biryńǵai júiesine jetkizetin bolady. Bul tórt platforma ózara jáne ózge memldekettik organdarmen aqparat almasatyn bolady",
— dedi Saǵadiev.
Ministr óz sózinde biryńǵai aqparattyq júieniń tiimdiligine toqtaldy. Onyń aitýynsha, bilim ministrligi úshin bul tolyq avtomattandyrýdy qamtamasyz etedi. "Iaǵni, biz árbir baǵany, árbir úi tapsyrmasyn, árbir muǵalimniń sabaq josparyn kóretin bolamyz. Muny ákimdik, oblystyq bilim basqarmasy jáne ata-analar da kóretin bolady. Býhgalteriia boiynsha da osylai. Budan bólek, oryn tapshylyǵy, mektep qurylysy kartasyn josparlaý sekildi máseleler de ońtailanady", — dedi ol.
Al muǵalimder ne utady?
Eń aldymen, synyptardy onlain baqylaýǵa, tolyǵymen qaǵazsyz esepke kóshýge múmkindik beredi. Sonymen birge attestatsiiadan ótý úshin qajet muǵalimniń búkil jyldardaǵy barlyq eńbekteri óziniń "jeke kabinetinde" bolady. Osylaisha muǵalimderdiń jumysyn aitarlyqtai jeńildetý kózdelip otyr.
"Ádilet, Ishki ister jáne Densaýlyq saqtaý ministrlikteriniń derekter bazasyn kiriktirsek, búginnen bastap muǵalimderdiń úi-úidi aralaýyn toqtatýǵa daiynbyz. 100 myńnan astam muǵalim jylyna eki ret barlyq úilerdi aralap, oqýshylardyń derekterin jinaidy. Bul jumysty endi istemei- aq qoiýǵa bolady. Óitkeni bul málimetter derekter bazasynda bar", — dedi Saǵadiev.
"Muǵalimder jylyna eki ret bir ai boiy júzdegen úidi aralaidy. Árbir úidiń esigin qaǵyp, sanaq júrgizetin. Olardy itter de tisteitin, túrli qaýipten de qashyp júretin. Endi muny jasaýdyń qajeti joq. Birinshi kezeń naýryzda bastalýy kerek. Biz muǵalimderdi osyndai jumystan bosatýdy kózdep otyrmyz", — dep atap ótti ministr.
Derekkóz: sputniknews.kz
