Astanada ótken «Jas Media. Aqparattyq tehnologiialar men Qazaqstan media salasynyń zamanaýi tujyrymdamasy» atty forýmda oqýshylarmen kezdesken Bilim jáne ǵylym ministri Erlan Saǵadiev osylai dedi.
«Úsh tildilik máselesin kótersek, aldymen aǵylshyn tili shyǵa keledi. Bul teris. Úsh tildilik - ol eń aldymen qazaq tili týraly baǵdarlama. Taǵy da atap aitamyn, úsh tildilik - eń aldymen qazaq tiline nazar salady. Qazaq tiliniń jaǵdaiy qazir jaman emes... Qazir oqýshylardyń 70 paiyzy qazaq tilinde oqidy. Biyl Biryńǵai ulttyq test tapsyrǵan oqýshylardyń 72 paiyzy synaqty qazaq tilinde tapsyrdy. Nazarbaev ziiatkerlik mektepteri grantynyń 70 paiyzyn qazaq tiline bóldi. Sondyqtan, jaǵdaiymyz jaman emes»
- deidi ministr.
Biraq, Bilim jáne ǵylym ministrin mazalaityn bir másele bar eken. Ol - orys mektepterinde oqyp júrgen bes júz myń balanyń til taǵdyry.
«Biraq, problema qandai? Qazir orys mektepterinde oqityn bes júz myń bala qazaqsha sóilemeidi. Sondyqtan, ministrliktiń aldyndaǵy eń joǵarǵy maqsat 3-4 jylda bes júz myń balany qalai qazaqsha sóiletemiz degen másele. Olar qazaqsha sóileý kerek qoi. Túsinip otyrmyz, oqytý ádistemesi durys emes. Eń aldymen durys ádisteme jasaý kerek. Úsh-tórt ziiatkerlik institýt jinalyp, ádistemeni daiyndap jatyr. Osy ádisteme daiyn bolsa, 2017 jyldan bastap orys mektepterinde qazaq tilinde ótetin sabaqtar ózgere bastaidy. Eń aldymen, durys ádisteme kerek. Zamanaýi ǵylymi negizde jasalǵan, kompiýterlik modeldeýden ótken alty aida til úiretetin ádisteme jasap jatyrmyz. Úsh jyldyń ishinde balalardyń barlyǵy qazaqsha sóileidi. Men oǵan senip otyrmyn»
- dedi ministr E.Saǵadiev.
Derekkóz: Qazaqparat
