Aıdos Sadyqovqa qastandyq jasaǵandar ustalǵan. Bul jaıtty onyń áıeli Natalá Sadyqova málimdedi. Sadyqovanyń aıtýynsha, oqıǵaǵa qatysy bar kúdiktilerdiń biri Qostanaı oblysynyń İshki ister departamentinde jumys isteıtin Meıram Qarataev bolǵan. İshki ister mınıstrligi osy málimdemege jaýap berdi, - dep habarlaıdy Dalanews.kz.
Vedomstvo Qarataevtyń İİM organdarynda jumys istemeıtinin aıtty.
"Azamat M.Qarataevqa qatysty onyń 2019 jyldyń qańtar aıynda ishki ister organdarynan bosatylǵanyn jáne qazirgi ýaqytta polısıa qyzmetkeri emes ekenin habarlaımyz. Qazir biz Memleket basshysynyń tapsyrmasyna sáıkes istiń barlyq mán-jaılaryn anyqtaý boıynsha tıisti jedel is-sharalar júrgizýdemiz. Osy jumystyń nátıjeleri boıynsha qosymsha aqparat beriledi", - dep jazylǵan habarlamada.
Buǵan deıin Ýkraınanyń Bas prokýratýrasy Sadyqovqa jasalǵan qastandyqqa baılanysty sotqa deıingi tergeý amaldary bastalǵanyn habarlaǵan edi.
Aıdos Sadyqov Ýkraınada resmı bosqyn mártebesin alǵan. Al 2023 jyldyń qazan aıynda Sadyqovqa Qazaqstanda "áleýmettik, ulttyq, rýlyq, tektik-toptyq nemese dinı alaýyzdyqty qozdyrǵany" úshin izdeý jarıalanǵan bolatyn.
Buǵan deıin Ermurat Bapı Aıdos Sadyqovty jaqsy biletinin, al "Báse" qatardaǵy opozısıalyq resýrs ekenin aıtty. Sondaı-aq, depýtat bul qastandyqqa Qazaqstan bıliginiń reaksıasy jóninde, Qazaqstannyń endigi áreketi qandaı bolatyny týraly pikir bildirdi.
"Sadyqovtardyń kásibı, saıası kózqarasy qalaı bolǵany mańyzdy emes. Eń mańyzdysy ol - Qazaqstan azamaty. Qaı jerden baryp saıası baspana alsa, ol - ekinshi kezektegi másele. Sondyqtan Qazaqstannyń bıligi, Qazaqstannyń tıisti memlekettik organdary Ýkraına tarapyna shyǵyp, bul máselege aralasýy kerek, suraý salýy kerek. Bul halyqaralyq dárejede rezonans alǵan oqıǵa ǵoı. Bir eldiń azamatyn ekinshi bir elde atyp ketý degen, onyń ústine jýrnalıs bolsa, opozısıalyq resýrstyń jetekshisi bolsa, mindetti túrde Qazaqstannyń tarapy aralasýy kerek. Ekinshiden, Qazaqstannyń buǵan eshqandaı da qatysy joq ekenin dáleldeýi kerek qoı. Qazaqstan tarapy únsiz qalatyn bolsa, onda basqa da pikir týýy múmkin. Qazaqstannyń bıligi bul iske mindetti túrde aralasyp, istiń mán-jaıyn bilýge áreket etýi kerek degen oıym bar", - dedi Bapı.
Al Prezıdent Qasym-Jomart Toqaev Qazaqstan bul is boıynsha tergeýge qatysýǵa daıyn ekenin aıtty.
"Elimizde Zań ústemdigin nyǵaıtyp jatyrmyz, ıaǵnı barlyq salada, eń aldymen, Zań ústemdigin qamtamasyz etý – basty mindet. Bul másele boıynsha meniń kózqarasym – aıqyn. Muny ózderińiz de jaqsy bilesizder. Qazaqstanda Zań men tártip bárinen bıik turýǵa tıis. Sondyqtan qoǵamdaǵy barlyq qarama-qaıshylyqtar men kelispeýshilikterdi tek qana quqyqtyq turǵydan, ıaǵnı tıisti Zańnamaǵa jáne negizgi halyqaralyq normalarǵa sáıkes sheshý qajet. Keshe Qazaqstan azamaty Aıdos Sadyqovqa qatysty Kıevte bolǵan qylmysqa da dál osy ustanym turǵysynan qaraǵan jón. Men dıplomatıalyq arnalar men quqyq qorǵaý organdary arqyly osy oqys oqıǵa boıynsha resmı suratýlar jiberý týraly naqty tapsyrma berdim. Sondaı-aq qajet bolǵan jaǵdaıda Qazaqstannyń resmı organdary istiń aqıqatyna jetýge járdem berý úshin tergeý jumysyna qatysýǵa daıyn ekenin aıtqym keledi, – dedi Prezıdent."
