Tóraǵanyń aitýynsha, mamandandyrylǵan aýdanaralyq sotynda sońǵy 5 jylda azamattyq ister boiynsha ata-ana quqyǵynan aiyrý boiynsha 1175, balanyń turǵylyqty meken-jaiyn anyqtaý maqsatynda 472, balamen kezdesý tártibin anyqtaýda 499, arnaiy mektep internatqa joldaý jóninde 147, áke dep tanyp aliment óndirý boiynsha 324, bala asyrap alý 2273, aliment mólsherin ózgertý týraly 258 is qaralǵan.
Budan bólek, ákimshilik ister boiynsha 5540 is sot qarýyna túsip, 5102 quqyqbuzýshyǵa qatysty ákimshilik qaýly shyqqan. Nátijesinde jalpy sommasy 56 mln. 510 myń 550 teńge aiyppul salynyp, óndirilgen. Sondai-aq 2221 qylmystyq is qaralyp, 560 sot úkimi shyǵarylǵan. Onyń 276-sy mediatsiia tártibimen sheshilgen.
«Kámeletke tolmaǵandardyń basym kópshiligi urlaý, tonaý, qaraqshylyq siiaqty dúnieqorlyq qylmystar jasaidy. Jasóspirimder jasaǵan qylmystardyń denin múlikke qatysty qylmystar qurap otyr. Kóbinese olar uialy telefondar, oiyn kompiýterleri, aqsha, kiim-keshekter urlaidy. Jasóspirimder mundai qylmystardy ádette eki-úsh adam bolyp, top bolyp jasap, jábirlenýshige kúsh kórsetip nemese kúsh kórsetemin dep qorqytyp jasaǵandyqtan, olardyń áreketteri aýyr qylmys retinde baǵalanyp jatady», – deidi Serikbai Tólepbergenov.
Aita keteiik, kámeletke tolmaǵandardyń isteri jónindegi mamandandyrylǵan aýdanaralyq soty elimizde alǵash ret Almaty, Astana qalalarynda synama retinde qurylǵan bolatyn. Tájiribe kórsetkendei iývenaldy sot óz ómirsheńdigin dáleldep, memleket qorǵaýynda turǵan otbasy, ana men bala, áke quqyqtaryn qorǵaýda taptyrmas júiege ainalyp otyr.
