Rıdderde qatty aıazǵa baılanysty janarmaı tasymaly qıyndap, qaladaǵy birqatar janarmaı quıý beketterinde benzın ýaqytsha taýsyldy, dep habarlaıdy Dalanews.kz.

Qala turǵyndary sýyq kúnderi kólikterimen janarmaı izdep, bir beketten ekinshisine qatynaýǵa májbúr. 

Rıdder qalasynyń kásipkerlik jáne týrızm bólimi málimetinshe, qazirgi tańda erkin satylymdaǵy janarmaı tek Roshına kóshesi, 10/1 mekenjaıynda ornalasqan «Bazis Aero» janarmaı quıý beketinde bar. Al «Alem Simple Service» beketinde janarmaı tek talon arqyly beriledi.

Qatty aıaz saldarynan «Helios» jáne «Qazaq Oil» janarmaı quıý beketterine ýaqytynda otyn jetkizilmegen. Sol sebepti qolda bar qor tolyqtaı satylyp ketken.

Qalalyq bólimniń habarlaýynsha, búgin tańerteń «Helios» pen «Qazaq Oil» beketterine árqaısysy 10 tonna AI-92 benzıni men 10 tonna dızel otyny, sondaı-aq 5 tonna AI-95 benzıni tıelgen eki-ekiden benzovoz jolǵa shyqqan.

Jaýapty organdardyń ýádesine saı, 19 qańtar kúni tústen keıin júrgizýshiler bul beketterde qaıtadan janarmaı quıa alady.