"Rýhani jańǵyrý" institýtynda "tyńdaityn memleket" kontseptsiiasy talqylandy
«Rýhani jańǵyrý» qazaqstandyq qoǵamdyq damý institýty» KeAQ tóraǵasy Kemelbek Oishybaev elimizdegi qazirgi jaǵdaidy eskere otyryp, «tyńdaityn memleket» mehanizmin egjei-tegjeili jetildirýdiń qajet ekenin atap ótti.
«Kóptegen elderde memleket pen halyq arasyndaǵy bailanystyń basty kórsetkishi retinde aqparattyń qoljetimdiligi qarastyrylady. Bul turǵyda memleket basshylyǵy qoǵam aldyndaǵy ashyqtyqtyń qajettiligin barynsha túsinedi jáne sózben ǵana emes, ispen de dáleldep jatyr. Sondyqtan, QQDI áleýmettik mańyzdy baǵyttar boiynsha pikirtalas alańyn tsikldi túrde uiymdastyryp keledi. Sarapshylardyń barlyq usynysy halyq pen memleket arasyndaǵy bailanysty odan ári kúsheitý jolyndaǵy mehanizmderdi jetildirý úshin paidalanylady, - dedi Kemelbek Oishybaev.
Halyqty áleýmettik qorǵaý jáne jumyspen qamtý baǵytyndaǵy aqparat ashyqtyǵy boiynsha óz pikirin «KazIýrKonsalting» JShS seriktesi Erlan Buzyrbaev ortaǵa salyp, usynystaryn jetkizdi. Onyń aitýynsha, búginde «ashyqtyq» jaiynda kóńil bólýdi qajet etetin máseleler barshylyq. Bul, ásirese, jekelegen sanattaǵy azamatattarǵa áleýmettik qyzmetter kórsetý máselelerine qatysty.
Memlekettiń transparenttiligin arttyrýda sarapshy qoǵamdyq baqylaýdyń myna mehanizmderin engizýdi usyndy: qoǵamdyq monitoring, qoǵamdyq tekseris, qoǵamdyq sarap jáne qoǵamdyq pikirtalas.
«Bul mehanizmder qazirdiń ózinde tiimdi júzege asyp jatyr. Endi qazir bastysy – ortaq júieni retke keltirýimiz kerek. Bul qadam memlekettik mekemelerge halyqpen tikelei keri bailanys ornatýǵa keremet múmkindik bolar edi», - dep túiindedi Buzyrbaev.
Sonymen qatar, pikirtalasqa qoǵam qairatkeri Aigúl Soloveva, QR Eńbek jáne áleýmettik qorǵaý ministrliginiń, QR Aqparat jáne qoǵamdyq damý ministrliginiń ókilderi, sondai-aq, jergilikti atqarýshy organdar men sarapshylar qatysty.
QQDI – qazaqstandyq qoǵamdyq damý institýty. «Rýhani jańǵyrý» baǵdarlamasynyń «Týǵan jer», «Qazaqstannyń kieli jerleriniń geografiiasy», «Latyn álipbiine kóshý», «Jahandaǵy zamanaýi qazaqstandyq mádeniet», «100 jańa oqýlyq», «Qazaqstannyń 100 jańa esimi» degen arnaiy baǵdarlamalaryn nátijeli túrde júzege asyrý maqsatynda qurylǵan.
