QR Premer-mınıstriniń birinshi orynbasary Roman Sklár «Shevron» korporasıasy Eýrazıa bólimshesiniń basqarýshy dırektory Derek Magness myrzamen kezdesý ótkizdi. Oǵan QR energetıka mınıstri Erlan Aqkenjenov jáne «QazMunaıGaz» UK» AQ basqarma tóraǵasy Ashat Hasenov qatysty, dep habarlaıdy Dalanews.kz.
Kezdesý barysynda taraptar munaı-gaz salasyndaǵy ekijaqty yntymaqtastyqtyń qazirgi jaǵdaıy men keleshegin talqylady.
Kelissózder kezinde Qazaqstan-Amerıka energetıkalyq seriktestiginiń flagmany sanalatyn Teńiz jobasyna erekshe nazar aýdaryldy.
Óz kezeginde Derek Magness Qazaqstandaǵy ınvestısıalyq ahýaldyń arqasynda Teńiz jobasy boıynsha mańyzdy óndiristik kórsetkishterge qol jetkizilgenin atap ótti. «Shevron» ókili retteýshi ortanyń boljamdylyǵyn jáne memlekettik organdarmen konstrýktıvti is-qımyldy erekshe atap ótip, bul uzaqmerzimdi ınvestısıalar úshin qolaıly jaǵdaı jasaıtynyn jetkizdi.
Sonymen qatar Roman Sklár Teńiz kenishinde oryn alǵan jáne óndiristiń ýaqytsha toqtap qalýyna ákep soqtyrǵan oqıǵalarǵa baılanysty alańdaýshylyq bildirdi.
«Shevron» basshylyǵy oqıǵalardyń saldaryn joıý jáne munaı óndirýdi kezeń-kezeńimen arttyrý boıynsha qabyldanǵan sharalar týraly habardar etti. Sondaı-aq «Shevron» basshylyǵy bolashaqta mundaı jaǵdaılarǵa jol bermeý jáne nysandardyń senimdi ári qaýipsiz jumysyn qamtamasyz etý boıynsha naqty is-qımyldar jasalatynyna senim bildirdi.
Budan bólek, geologıalyq barlaý jumystaryn damytý máseleleri talqylandy. «Shevron» kompanıasy birqatar geologıalyq barlaý jobasyna qyzyǵýshylyq tanytatynyn málimdedi.
Kezdesý sońynda taraptar uzaqmerzimdi jáne ózara tıimdi yntymaqtastyqty odan ary damytýǵa beıildilikterin, sondaı-aq ózara is-qımyldyń barlyq baǵyty boıynsha syndarly dıalogke daıyn ekendikterin jetkizdi.
