Avstraliialyq tennisshi Daria Savildiń Parij Olimpiadasyna qatyspaityny belgili boldy. Al kúni keshe oiynnan bas tartqan Qazaqstannyń birinshi raketkasy Elena Rybakina aldaǵy kúnderi Kanadada ótetin jarysta baq synamaq, dep habarlaidy Dalanews.kz.
Endi Daria Savildi álemniń 95-raketkasy, italiialyq tennisshi Sara Errani almastyrady.
Buǵan deiin WTA reitinginde 4-orynda turǵan qazaqstandyq tennisshi Elena Rybakina 2024 jyly Parijde ótetin Olimpiada oiyndaryna qatysýdan bas tartý týraly sheshim qabyldaǵany belgili bolǵan edi.
"Qurmetti qazaqstandyqtar! Maǵan bul týraly aitý ońaiǵa soqpady. Ókinishke qarai, Parij Olimpiadasyna qatysa almaimyn. Ýimbldon týrnirinen keiin men jedel bronhitpen aýyryp qaldym, jattyǵýǵa qaita oralýǵa tyrysqanymmen, denem áli qalpyna kelgen joq. Dárigerler kortqa shyǵýyma úzildi-kesildi tyiym saldy", - dedi ol.
Osy tusta ol Olimpiadaǵa qatysatyn qazaqstandyq sportshylardy qoldaitynyn jetkizdi.
Rybakina Kanadada ótetin jarysqa qatyspaq
Alaida Qazaqstannyń birinshi raketkasy Elena Rybakina Parij Olimpiadasyna qatysýdan bas tartqanymen, aldaǵy kúnderi Kanadadaǵy jarysqa qatysýdy kózdep otyrǵany belgili boldy.
Kanadanyń Toronto qalasynda dástúrli National Bank Open 2024 týrniri ótedi. Onyń júlde qory – 7 million dollardan joǵary.
"Rybakina 2024 jyly birneshe jarysty sońyna jetkizbei orta joldan aiaqtady. Bul densaýlyǵyna bailanysty oryn aldy. Olimpiadadan bólek, Indian-Ýells, Rim, Istborn týrnirlerinde aýyryp, kortqa shyǵa almady. 25 jastaǵy tennisshi sońǵy ret Ýimbldon týrnirine qatysyp, jartylai finalda Barbora Kreichikovadan jeńildi. Endi ol Soltústik Amerikadaǵy hard týrnirlerine qatysady. 6 tamyzda bastalatyn Torontodaǵy National Bank Open týrnirinde baq synaidy", - dep jazdy tennis.com saity.
Eske salaiyq, buǵan deiin Qazaqstan tennis federatsiiasy tennisten áielder quramasynyń kóshbasshysy Elena Rybakina densaýlyǵyna bailanysty Parijde ótetin HHHIII jazǵy Olimpiada oiyndaryna qatysa almaitynyn málimdegen bolatyn.
Federatsiianyń málimetinshe, qazir Elena bronhitpen aýyryp jatyr. Dárigerler oǵan tek kortqa ǵana emes, jarystarǵa ushýǵa úzildi-kesildi tyiym salyp otyr.
«Rybakina Olimpiadada joǵary deńgeide oiyn kórsetýge úmittenip, oiyndarǵa belsendi túrde daiyndaldy. Biraq aýrýǵa bailanysty bul múmkin bolmady. Qazaqstan tennis federatsiiasy Elenanyń tezirek saýyǵyp, kortqa sátti oralýyn shyn júrekten tileidi. Biz oǵan senemiz jáne onyń jattyǵýlar men jarystarǵa qaita oralýyn asyǵa kútemiz», – delingen habarlamada.
