اۆستراليالىق تەننيسشى داريا ءساۆيلدىڭ پاريج وليمپياداسىنا قاتىسپايتىنى بەلگىلى بولدى. ال كۇنى كەشە ويىننان باس تارتقان قازاقستاننىڭ ءبىرىنشى راكەتكاسى ەلەنا رىباكينا الداعى كۇندەرى كانادادا وتەتىن جارىستا ب ا ق سىناماق، دەپ حابارلايدى Dalanews.kz.
ەندى داريا ءساۆيلدى الەمنىڭ 95-راكەتكاسى، يتاليالىق تەننيسشى سارا ەرراني الماستىرادى.
بۇعان دەيىن WTA رەيتينگىندە 4-ورىندا تۇرعان قازاقستاندىق تەننيسشى ەلەنا رىباكينا 2024 جىلى پاريجدە وتەتىن وليمپيادا ويىندارىنا قاتىسۋدان باس تارتۋ تۋرالى شەشىم قابىلداعانى بەلگىلى بولعان ەدى.
"قۇرمەتتى قازاقستاندىقتار! ماعان بۇل تۋرالى ايتۋ وڭايعا سوقپادى. وكىنىشكە قاراي، پاريج وليمپياداسىنا قاتىسا المايمىن. ۋيمبلدون تۋرنيرىنەن كەيىن مەن جەدەل برونحيتپەن اۋىرىپ قالدىم، جاتتىعۋعا قايتا ورالۋعا تىرىسقانىممەن، دەنەم ءالى قالپىنا كەلگەن جوق. دارىگەرلەر كورتقا شىعۋىما ۇزىلدى-كەسىلدى تىيىم سالدى"، - دەدى ول.
وسى تۇستا ول وليمپياداعا قاتىساتىن قازاقستاندىق سپورتشىلاردى قولدايتىنىن جەتكىزدى.
رىباكينا كانادادا وتەتىن جارىسقا قاتىسپاق
الايدا قازاقستاننىڭ ءبىرىنشى راكەتكاسى ەلەنا رىباكينا پاريج وليمپياداسىنا قاتىسۋدان باس تارتقانىمەن، الداعى كۇندەرى كاناداداعى جارىسقا قاتىسۋدى كوزدەپ وتىرعانى بەلگىلى بولدى.
كانادانىڭ تورونتو قالاسىندا ءداستۇرلى National Bank Open 2024 ءتۋرنيرى وتەدى. ونىڭ جۇلدە قورى – 7 ميلليون دوللاردان جوعارى.
"رىباكينا 2024 جىلى بىرنەشە جارىستى سوڭىنا جەتكىزبەي ورتا جولدان اياقتادى. بۇل دەنساۋلىعىنا بايلانىستى ورىن الدى. وليمپيادادان بولەك، ينديان-ۋەللس، ريم، يستبورن تۋرنيرلەرىندە اۋىرىپ، كورتقا شىعا المادى. 25 جاستاعى تەننيسشى سوڭعى رەت ۋيمبلدون تۋرنيرىنە قاتىسىپ، جارتىلاي فينالدا باربورا كرەيچيكوۆادان جەڭىلدى. ەندى ول سولتۇستىك امەريكاداعى حارد تۋرنيرلەرىنە قاتىسادى. 6 تامىزدا باستالاتىن تورونتوداعى National Bank Open تۋرنيرىندە ب ا ق سىنايدى"، - دەپ جازدى tennis.com سايتى.
ەسكە سالايىق، بۇعان دەيىن قازاقستان تەننيس فەدەراسياسى تەننيستەن ايەلدەر قۇراماسىنىڭ كوشباسشىسى ەلەنا رىباكينا دەنساۋلىعىنا بايلانىستى پاريجدە وتەتىن ءحححىىى جازعى وليمپيادا ويىندارىنا قاتىسا المايتىنىن مالىمدەگەن بولاتىن.
فەدەراسيانىڭ مالىمەتىنشە، ءقازىر ەلەنا برونحيتپەن اۋىرىپ جاتىر. دارىگەرلەر وعان تەك كورتقا عانا ەمەس، جارىستارعا ۇشۋعا ۇزىلدى-كەسىلدى تىيىم سالىپ وتىر.
«رىباكينا وليمپيادادا جوعارى دەڭگەيدە ويىن كورسەتۋگە ۇمىتتەنىپ، ويىندارعا بەلسەندى تۇردە دايىندالدى. ءبىراق اۋرۋعا بايلانىستى بۇل مۇمكىن بولمادى. قازاقستان تەننيس فەدەراسياسى ەلەنانىڭ تەزىرەك ساۋىعىپ، كورتقا ءساتتى ورالۋىن شىن جۇرەكتەن تىلەيدى. ءبىز وعان سەنەمىز جانە ونىڭ جاتتىعۋلار مەن جارىستارعا قايتا ورالۋىن اسىعا كۇتەمىز»، – دەلىنگەن حابارلامادا.
