Respublica partiiasynyń úmitkeri Reseide bilim alyp jatqan stýdentterge alańdaýshylyq bildirdi
«Qazaqstan Reseidegi stýdentter sany boiynsha jetekshi elderdiń kóshin bastap tur. Búgingi tańda Reseidiń joǵary oqý oryndary men olardyń sheteldegi filialdarynda 61 myń qazaqstandyq bilim alyp jatyr. Bul – Resei Federatsiiasynyń Joǵary bilim jáne ǵylym ministrliginiń resmi derekteri. Ulttyq turǵydan alǵanda, alańdatarlyq tsifr. Ózge elde bilim alyp kelip, oqýyn Reseide jalǵastyratyndar da bar, ókinishti. Reseilik joǵary bilim bizdi jetistikke jetkizbeidi», - deidi kandidat.
Jastarymyzdyń bilim izdep teriskeidi betke alýynyń bir sebebi - onda kóptegen stýdentterimiz tegin oqidy. Al Qazaqstanda óz jastarymyzǵa odan da jaqsyraq jaǵdai jasaýǵa ne kedergi?
Oljas Quspekovtyń paiymynsha, bizde ol úshin barlyq resýrs ta, kúsh te bar.
«Men bir nárseni anyq bilemin, kadrlardy daiyndaý jaǵynan reseilik joǵary oqý oryndarynda eshteńe joq. Máselen, olardyń álemdi eleń etkizgen qandai da bir ǵylymi jańalyqtaryn nemese ýniversitetterindegi ǵylymi ortalyqtardyń aýyz toltyryp aitarlyq jetistikterin estidińiz be nemese oqydyńyz ba? Óz basym olardy halyqaralyq salada kórgen de emespin, bilmeimin de», - deidi partiia ókili.
Bilim – tiimdi kúshtiń, oilaý men kózqarasty qalyptastyrýdyń biregei quraly. Eger biz stýdentterimizdi Batys nemese Aziia elderine jiberemiz be, onda dál qazirgi tańda Eýropa, Amerika, Avstraliia, Koreia ýniversitetterine basa nazar aýdarý qajet. Sosyn olar elge kelip qyzmet etýi tiis. Bul mindetti bolýy kerek. Nemese ózimizde oqysyn, óz elimizde bilim alsyn! Sonda ǵana elin súietin, halqyna qyzmet etetin býyndy saqtap qala alamyz.
Bul – Oljas Quspekovtyń pikiri.
«Bir qyzyǵy, qazir sailaýǵa túsip jatqan Qazaqstan halyqtyq partiiasynyń – burynǵy kommýnisterdiń kózqarasy basqasha. Máselen, «Vesti FM» radiosynyń «Solovev» baǵdarlamasynyń tikelei efirinde partiia lideri Ermuhamet Ertisbaev TMD Resei úshin jetkilikti tiimdi qurylym ekenin aitty. Óitkeni, mundaǵy basty faktor – TMD elderi bir-biriniń joǵary bilim berý júiesindegi diplomdaryn tanidy. Al TMD elderi stýdentteriniń kópshiligi qaida oqyp júr? Árine, Reseide!» - dedi kandidat.
Ol bul ahýaldyń ózin qatty alańdatatynyn aitady. Onyń oiynsha, biz ne otandyq bilimge, ne qazirden bastap Aivi ligasyna nazar aýdarýymyz kerek.
