Sheshenstan basshysy Ramzan Qadyrov Resei áskeriniń Limanda sheginýine ortalyq áskeri okrýgqa jetekshilik etetin general polkovnik Aleksandr Lapin kináli dep málimdedi.
Bul týraly Azattyq habarlaidy.
"Sol aýmaq qorǵanysyna ortalyq áskeri okrýgqa jetekshilik etetin general-polkovnik Aleksandr Lapin jaýap beredi. Lisichanskini alǵany úshin Resei batyry juldyzyn alǵan Lapin. Oǵan batys áskeri okrýgynyń áskerin de senip tapsyrǵan" dep jazdy Qadyrov.
Bir kún buryn Ýkraina áskeriniń Donetsk oblysynda Liman qalasyna kirgeni rastalǵan. Buǵan qosa, onda bes myń orys soldatynyń qorshaýda qalǵany habarlanǵan edi. Keiingi kúnderi munda qyzý shaiqas júrgen.
Sheshenstan basshysynyń aitýynsha, Lapin Limandaǵy orys áskerin qajetti bailanyspen qamtamasyz etpei, oq-dárisiz qaldyrǵan. Ol osy aimaqta jeńilis bolýy múmkin ekenin buryn eskertkenin, Lapinniń ózi muny Resei qarýly kúshteriniń jetekshisi Valerii Gerasimovpen talqylaǵanyn aitty.
"Biraq general Lapinniń qolbasshylyq ónerine shák keltirmei, Liman men mańynda sheginis bolmaidy dep sendirgen" dedi Qadyrov.
Qadyrovtyń aitýynsha, bir apta ótken soń Lapin óz shtabyn Limannan júzdegen shaqyrym jerdegi Starobelskige kóshirgen, general-polkovniktiń ózi Lýganskide bolǵan.
"Lapinniń darynsyz basshy bolǵany emes, joǵarydaǵy bas shtab jetekshileriniń ony qorǵap-qolpashtap otyrǵany jabyrqatady. Maǵan salsa, Lapindi marapattarynan aiyryp, qatardaǵy jaýynger qylyp, qolyna avtomat ustatyp, aldyńǵy shepke jiberer edim. Óz masqarasyn qanymen jýyp-shaisyn" dep jazdy Qadyrov.
Sheshenstan basshysynyń pikirinshe, shekara aýmaqta áskeri jaǵdai jariialap, "qýaty az iadrolyq qarý" paidalaný kerek.
Mamyr aiynda BBC-diń Orys qyzmeti general Lapinniń óz ulyn – 1-gvardiialyq tankter polkin basqarǵan, Sýmy men Chernigovtaǵy shabýylyn sátsiz aiaqtaǵan podpolkovnik Denis Lapindi marapattaǵanyn jazdy. "Zvezda" telearnasynda Resei armiiasyn marapattaý týraly siýjet shyǵatyn kúni orys kúshteri Chernigov pen Kiev baǵytynda sheginip jatty.
https://dalanews.kz/news/81101-otbasyndagy-zorlyq-zombylyqqa-zhol-be
