Rýslan Fatihuly, siz qatardaǵy azamattyń biri emes, arqasyna el amanatyn arqalaǵan Qorǵanys ministrisiz. Sondyqtan da memlekettik tilge salǵyrttyq tanytpai, qurmetpen qaraýǵa tiissiz.
Memlekettik tilde sóileý arqyly artyńyzdaǵy san myńdaǵan sarbazdarǵa ónege kórsetýge mindetti ekenińizdi esten shyǵarmańyz.
Áskerimizdiń jáne onyń keńsesiniń tili tolyq qazaqsha bolatyn ýaqyt jetti. Ózińiz aitqandai, qyryq qazaq otyryp ortadaǵy jalǵyz ózge ult ókili úshin orys tilinde sóileý Keńestik júieden qalyp qoiǵan otarlyq sananyń kórinisi.
Sondyqtan da táýelsiz eldiń qolbasshy generaly retinde bul máselege jańasha qarańyz.
Men sizdiń áskeri maman retinde kásibi tájiribeńizge, atqaryp kele jatqan eńbegińizge qurmetpen qaraimyn.
Otanymyzdyń áskerin basqarý úshin memlekettik tildi erkin meńgerý asa mańyzdy. Siz sekildi memleketik tilde sóileýge basynda qinalsa da keiin talaby men jigeriniń arqasynda ana tilinde erkin, kórkem sóileýge qol jetkizgen general Toqtar Áýbákirov aǵamyz sizge jaqsy úlgi bola alady.
Repetitor jaldańyz, qazaqsha kitap oqyńyz, otbasynda qazaqsha sóilesińiz. Kóp keshikpei jaqsy nátijege qol jetkize alasyz.
Otan qorǵaý jolyndaǵy asa mańyzdy jumysyńyzǵa sáttilik tileimin!
