Belgili skripkashy Aiman Musaqojaeva rektorlyq qyzmetke qaita oralý úshin alaiaqqa 200 myń dollar bergen. Bul týraly belgili jýrnalist Mihail Kozachkov málimdedi, dep habarlaidy Dalanews.kz.
Jýrnalist Mihail Kozachkovtyń sózine súiensek, 37 jastaǵy semeilik azamat ózin UQK tóraǵasynyń jieni retinde tanystyryp, eki adamdy aldaǵan. Biri — burynǵy shekara qyzmetkeri, ekinshisi — áigili skripkashy Aiman Musaqojaeva. Alaiaq óner iesin rektorlyq qyzmetke qaita taǵaiyndap beremin dep sendirgen.
Mihail Kozachkovtyń jazýynsha, Arman Tajenov “biznesin” 2024 jyldyń kókteminde Shymkentten bastaǵan. Ol jaqta UQK Shekara qyzmetiniń burynǵy qyzmetkerimen tanysady. Ol adam qaitadan qyzmetke oralǵysy kelgen. Sonda Tajenov ózin KNB basshysynyń týysymyn dep tanystyryp, máseleni sheshýge bolatynyn, biraq ol úshin 10 myń dollar qajet ekenin aitqan. Aqshany qolma-qol alǵan soń, birneshe aidan keiin taǵy 2 million teńge suraǵan. Jábirlenýshi bul somany da terminal arqyly jibergen. Biraq ýáde oryndalmaǵan, qyzmet te joq, aqsha da joq.
“Sol kezeńde Tajenovke taǵy bir “tapsyrys” túsedi. Bul joly Aiman Musaqojaevany Ulttyq óner ýniversitetiniń rektory etip qaita taǵaiyndaýǵa ýáde beredi. Belgili skripkashy 1998 jyldan beri osy oqý ornyn basqaryp kelgen, alaida 2024 jyldyń basynda zeinetke shyqqan. Úide otyra almai, jumysqa qaita oralǵysy kelgen bolýy kerek. Osylaisha, onyń joldasy — kásipker ári metsenat Asqar Bekbaev, rektorlyq qyzmetti qaitara alamyz degenderge 200 myń dollar beredi”, — deidi jýrnalist.
Kozachkovtyń aitýynsha, bul somanyń jartysy Tajenovke Almatyda tabystalǵan. Keiinirek ol taǵy 100 myń dollar suraǵan. Biraq deldal bul qarajatty birden bere almai, kepil retinde kóligin ýaqytsha Tajenovtiń atyna rásimdep beredi. Alaida bári sátsiz aiaqtalady. Musaqojaeva qyzmetke oralmaidy, al ýáde bergen adam habarsyz ketedi.
“Osy sátte aldanyp qalǵandar quqyq qorǵaý organdaryna júgingen. Arman Tajenov 2024 jyldyń qarashasynda ustalyp, qamaýǵa alynǵan. Tergeý kezinde ol kinásin moiyndap, keltirilgen shyǵyndy ótegen. Osyny eskergen sýdia Quralai Darhanova oǵan 4 jyl shartty jaza taǵaiyndady”, — deidi jýrnalist.
Úkim áli zańdy kúshine engen joq.
