بەلگىلى سكريپكاشى ايمان مۇساقوجايەۆا رەكتورلىق قىزمەتكە قايتا ورالۋ ءۇشىن الاياققا 200 مىڭ دوللار بەرگەن. بۇل تۋرالى بەلگىلى جۋرناليست ميحايل كوزاچكوۆ مالىمدەدى، دەپ حابارلايدى Dalanews.kz.

جۋرناليست ميحايل كوزاچكوۆتىڭ سوزىنە سۇيەنسەك، 37 جاستاعى سەمەيلىك ازامات ءوزىن ۇقك ءتوراعاسىنىڭ جيەنى رەتىندە تانىستىرىپ، ەكى ادامدى الداعان. ءبىرى — بۇرىنعى شەكارا قىزمەتكەرى، ەكىنشىسى — ايگىلى سكريپكاشى ايمان مۇساقوجايەۆا. الاياق ونەر يەسىن رەكتورلىق قىزمەتكە قايتا تاعايىنداپ بەرەمىن دەپ سەندىرگەن.

ميحايل كوزاچكوۆتىڭ جازۋىنشا، ارمان تاجەنوۆ “بيزنەسىن” 2024 جىلدىڭ كوكتەمىندە شىمكەنتتەن باستاعان. ول جاقتا ۇقك شەكارا قىزمەتىنىڭ بۇرىنعى قىزمەتكەرىمەن تانىسادى. ول ادام قايتادان قىزمەتكە ورالعىسى كەلگەن. سوندا تاجەنوۆ ءوزىن كنب باسشىسىنىڭ تۋىسىمىن دەپ تانىستىرىپ، ماسەلەنى شەشۋگە بولاتىنىن، ءبىراق ول ءۇشىن 10 مىڭ دوللار قاجەت ەكەنىن ايتقان. اقشانى قولما-قول العان سوڭ، بىرنەشە ايدان كەيىن تاعى 2 ميلليون تەڭگە سۇراعان. جابىرلەنۋشى بۇل سومانى دا تەرمينال ارقىلى جىبەرگەن. ءبىراق ۋادە ورىندالماعان، قىزمەت تە جوق، اقشا دا جوق.

“سول كەزەڭدە تاجەنوۆكە تاعى ءبىر “تاپسىرىس” تۇسەدى. بۇل جولى ايمان مۇساقوجايەۆانى ۇلتتىق ونەر ۋنيۆەرسيتەتىنىڭ رەكتورى ەتىپ قايتا تاعايىنداۋعا ۋادە بەرەدى. بەلگىلى سكريپكاشى 1998 جىلدان بەرى وسى وقۋ ورنىن باسقارىپ كەلگەن، الايدا 2024 جىلدىڭ باسىندا زەينەتكە شىققان. ۇيدە وتىرا الماي، جۇمىسقا قايتا ورالعىسى كەلگەن بولۋى كەرەك. وسىلايشا، ونىڭ جولداسى — كاسىپكەر ءارى مەسەنات اسقار بەكبايەۆ، رەكتورلىق قىزمەتتى قايتارا الامىز دەگەندەرگە 200 مىڭ دوللار بەرەدى”، — دەيدى جۋرناليست.

كوزاچكوۆتىڭ ايتۋىنشا، بۇل سومانىڭ جارتىسى تاجەنوۆكە الماتىدا تابىستالعان. كەيىنىرەك ول تاعى 100 مىڭ دوللار سۇراعان. ءبىراق دەلدال بۇل قاراجاتتى بىردەن بەرە الماي، كەپىل رەتىندە كولىگىن ۋاقىتشا تاجەنوۆتىڭ اتىنا راسىمدەپ بەرەدى. الايدا ءبارى ءساتسىز اياقتالادى. مۇساقوجايەۆا قىزمەتكە ورالمايدى، ال ۋادە بەرگەن ادام حابارسىز كەتەدى.

“وسى ساتتە الدانىپ قالعاندار قۇقىق قورعاۋ ورگاندارىنا جۇگىنگەن. ارمان تاجەنوۆ 2024 جىلدىڭ قاراشاسىندا ۇستالىپ، قاماۋعا الىنعان. تەرگەۋ كەزىندە ول كىناسىن مويىنداپ، كەلتىرىلگەن شىعىندى وتەگەن. وسىنى ەسكەرگەن سۋديا قۇرالاي دارحانوۆا وعان 4 جىل شارتتى جازا تاعايىندادى”، — دەيدى جۋرناليست.

ۇكىم ءالى زاڭدى كۇشىنە ەنگەن جوق.