"Aldaǵy aýqymdy sharanyń shyrqyn buzǵysy kelgender Toqaevqa qarsy buryn-sońdy bolmaǵan agitatsiiany bastap ketti. Taǵdyrsheshti tańdaý jasaityn kún jaqyn. Buǵan jan-tánimen qarsy boikotshylar baibalamǵa basyp, referendým týraly teris pikir qalyptastyrýǵa tyrysyp baǵýda.
Bulardyń túp maqsaty - Jańa Qazaqstannyń irgesin qalaýǵa, saiasi reformaǵa sýsap otyrǵan eldiń eńse tikteýine kedergi keltirý.
Toqaevtyń aýzynan shyqqan ár sózdi ańdyp otyrǵan boikotshylar jalǵan aqpar taratýǵa ábden mashyqtanyp alǵan. Ata zańǵa enetin ózgeristerdiń óńin ainaldyryp, "qujatta Nazarbaev pen onyń áýletine qatysty barlyq artyqshylyq saqtalady" dep, eldi adastyryp, shatastyryp júrgen de solar", – deidi osy oraida jýrnalist Ibrash Núsipbaev.
Áriptesimizdiń aitýynsha,
referendýmǵa boikot jariialaǵan naýqannyń ushar basynda eks-prezidenttiń tusynda shashyp-tógip, shalqyp ómir súrgen top tur. Olardyń ózgeris dese, allergiiasy qozady.
Aqsha kórse, joldan taiatyn, kez kelgen taqyrypqa kósile beretin blogerlerdiń urtyn mailap, Jańa Qazaqstandy jamandaýǵa buiryq bergen de osy top.
"Nazarbaevtyń klany" referendýmǵa boikot jariialaityn buqaranyń qarasy kóbeigenin qalaidy. "Ata zańǵa enetin túzetýden ómir ózgermeidi, turmys túzelmeidi" dep paiymdaityn qaýymnyń shoǵyry ulǵaia tússe deidi.
Saiasi belsendiligi tómen, mundai deńgeidegi sharalarǵa samarqaý qaraityn aýditoriia Nazarbaev biliginiń ǵumyryn uzartyp kelgen.
Sói degen Ibrash Núsipbaev:
"Jaldamaly blogerler: Ata zańnyń 46-shy baby, 1,2,3-shi tarmaǵynda Elbasy men onyń áýletiniń artyqshylyǵy saqtalatyny taiǵa tańba basqandai jazylǵan" dep ýlap-shýlap júr. Sóitip osy qujatty ústirt sholyp shyqqan qaýymdy shatastyryp otyr.
Shyn máninde 46-shy baptyń 4 tarmaǵynan "Tuńǵysh prezidenttiń mártebesi men ókileti Konstitýtsiiamen jáne konstitýtsiialyq zańmen aiqyndalady" degen tarmaqty alyp tastaǵan", – deidi ol.
46-shy baptyń jańa nusqasynda ilgeridegi 4 tarmaqtyń kózi joiylǵan.
Jańa nusqada:
1. Qazaqstan Respýblikasynyń Prezidentine, onyń abyroiy men qadir-qasietine eshkimniń tiisýine bolmaidy.
2. Respýblika Prezidenti men onyń otbasyn qamtamasyz etý, olarǵa qyzmet kórsetý jáne qorǵaý memleket esebinen júzege asyrylady.
3. Osy baptyń erejeleri Respýblikanyń eks-Prezidentterine qoldanylady.
Nazarbaevtyń ókilettigi men mártebesi Konstitýtsiia arqyly anyqtalatyny týraly tarmaq jańa Ata zańda bolmaidy.
Tuńǵysh Prezident týraly eski zańda Nazarbaevty jaýapqa tartý ǵana emes, sonymen birge ustaýǵa, qamaýǵa alýǵa, tintýge, jaýap alýǵa nemese jeke tekserýge bolmaidy delingen.
Qol suqpaý týraly zań prezidentke jáne onymen birge turatyn otbasy múshelerine jeke menshik quqyǵymen tiesili barlyq múlikke, sondai-aq olar paidalanatyn turǵyn jáne qyzmettik úi-jailarǵa, qyzmettik kólikke, bailanys quraldaryna, hat-habarlarǵa, olarǵa tiesili qujattarǵa da qoldanylǵan.
Tiispeýshilik Qazaqstan Tuńǵysh prezidenti – Elbasy qoryna jáne ol qurǵan ózge de zańdy tulǵalarǵa tiesili múlikke de bailanysty bolǵan.
Budan bólek, konstitýtsiialyq zań Nazarbaev pen onymen birge turatyn otbasy múshelerine tiesili bank shottarynyń qupiialyǵyna jáne oǵan qol suqpaýyna kepildik berilgen edi.
...
Ibrash Núsipbaevtyń atap ótkenindei Ata zańǵa enetin osy jáne ózge de túzetýler Nazarbaev áýletiniń sheksiz biligine birjolata núkte qoiyp, barsha artyqshylyqtan aiyrady.
Ótken otyz jylda zańǵa tompaq keletin áreket jasaǵany dáleldense, eks-prezident pen onyń aǵaiyn-týystaryn tergep, tintetin, tipti qylmystyq jaýapkershilikke tartatyn múmkindik týady.
Semianyń sheteldegi shottaryna qulyp salynyp, olardy halyqqa qaitarý máselesi kóteriledi. Otbasyǵa tiesili dúnie-múliktiń shyǵý tegi zerdelenip, olardyń qalai, qandai jolmen kelgeni anyqtalady.
[caption id="attachment_77523" align="aligncenter" width="2560"]
"Biraq, bir kiltipan bar! Eger Ata zańǵa tiisti ózgertýler engizilmese, bul aitylǵannyń bári kózden bulbul ushady. Nazarbaev pen onyń áýleti báz-baiaǵy statýsyn saqtap qalady. Referendýmǵa boikot jariialaǵan Nazarbaev klanynyń kózdegeni de, kóksegeni de osy.
Olar úshin el múddesinen buryn, eks-prezident pen onyń otbasynyń mártebesi mańyzdyraq. Olar eshteńeden taiynbaidy. Olardyń esil-derti Toqaevty tobyqtan shalý, saiasi reformanyń súikimin ketirý. Jaldamaly blogerlerdi Jańa Qazaqstanǵa aidap salǵany óz aldynda, tipti jekelegen aqparat quraldaryn satyp alyp, referendýmǵa boikot jariialaýǵa qyzý kirisip ketken jaiy bar", – deidi áriptesimiz.
Ázirlegen, Dýman BYQAI
