Ulytaý oblysynda ótken «Ulytau Invest–2026» Qazaqstan–Qytai investitsiialyq forýmy aiasynda jalpy quny 368,6 million AQSh dollaryn quraityn investitsiialyq memorandýmdarǵa qol qoiyldy, dep habarlaidy dalanews.kz.
Qujattar turǵyn úi qoryn jáne qalalyq infraqurylymdy jańǵyrtýǵa, ónerkásipti damytýǵa, shahtalardaǵy óndiristik qaýipsizdikti kúsheitýge, tómen kómirtekti indýstriialyq klaster qalyptastyrýǵa jáne óńirde jel elektr stantsiialaryn salýǵa baǵyttalǵan birqatar investitsiialyq jobalardy iske asyrýdy kózdeidi.
Forým Qazaqstan men Qytaidyń memlekettik organdary, biznes jáne investitsiialyq qaýymdastyqtarynyń ókilderin bir alańǵa jinady. Aýqymdy is-sharaǵa Qytaidyń 20-dan astam iri kompaniiasynyń delegatsiialary qatysty.
Is-sharaǵa deiin Ulytaý oblysynyń ákimi Dastan Ryspekov Shensi provintsiiasynan kelgen delegatsiia basshysy Van Tszintszinmen ekijaqty kezdesý ótkizip, saýda-ekonomikalyq yntymaqtastyqty keńeitý jáne jańa investitsiialyq jobalardy júzege asyrý máselelerin talqylady.
«Ulytau Invest–2026» forýmy barysynda oblystyń taý-ken metallýrgiiasy, óńdeý ónerkásibi, agroónerkásip, energetika, logistika jáne infraqurylym salalaryndaǵy investitsiialyq múmkindikteri tanystyryldy. Sondai-aq Qazaqstan men Qytai kásipkerleri arasynda B2B jáne G2B formatyndaǵy kezdesýler uiymdastyrylyp, jańa jobalardy birlesip iske asyrý jáne áriptestikti keńeitý baǵyttary qarastyryldy.
Is-sharada sóz sóilegen Ulytaý oblysynyń ákimi Dastan Ryspekov halyqaralyq yntymaqtastyq pen investitsiia tartý óńir damýynyń negizgi basymdyqtarynyń biri ekenin atap ótti. Onyń aitýynsha, forým buǵan deiin oblys delegatsiiasynyń Qytaidyń Sian qalasyna jumys sapary barysynda qol jetkizilgen kelisimderdiń naqty jalǵasy boldy.
Forýmnyń resmi bóliginen keiin Qytai delegatsiiasynyń ókilderi óńirdegi investitsiialyq alańdar men óndiristik kásiporyndardy aralap, iske asyrylyp jatqan jáne bolashaq investitsiialyq jobalarmen tanysty.
