Qyrǵyzstannyń burynǵy depýtaty jáne eks-eńbek ministri Ulyqbek Kochkorovtyń AQSh-ta kýrer bolyp jumys istep júrgeni týraly aqparat áleýmettik jelilerde qyzý talqylanýda, dep habarlaidy dalanews.kz.
Jelide taraǵan videoda er adamnyń kólikke sálemdemeler tiep jatqany kórinedi. Video avtorlary bul adamnyń Qyrǵyzstannyń burynǵy joǵary laýazymdy sheneýnigi Ulyqbek Kochkorov ekenin jáne onyń qazir Chikago qalasynda Amazon jetkizý qyzmetinde jumys isteitinin málimdegen.
Ulyqbek Kochkorov Qyrǵyzstanda belgili saiasatkerlerdiń biri sanalady. Ol ár jyldary Jogorký Keńesh depýtaty boldy, 2017 jylǵy prezident sailaýyna qatysyp, keiin Eńbek jáne áleýmettik damý ministri qyzmetin atqardy.
2020 jylǵy saiasi oqiǵalardan keiin Kochkorov memlekettik qyzmetten ketken. Sońǵy jyldary onyń otbasymen birge AQSh-tyń Chikago qalasynda turyp jatqany belgili.
Alaida burynǵy ministr ázirge áleýmettik jelide taraǵan videoǵa jáne óziniń kýrer bolyp jumys isteitini jónindegi aqparatqa qatysty eshqandai pikir bildirgen joq.
Jeli qoldanýshylary bul jaǵdaidy qyzý talqylap jatyr. Biri saiasatkerdiń adal eńbek etip júrgenin qoldasa, endi biri onyń AQSh-taǵy jańa ómirine nazar aýdarýda.
