Qyrǵyzstan eldegi benzin tapshylyǵy men Resei importyna táýeldilikke bailanysty Qazaqstannan jáne taǵy bes memleketten janar-jaǵarmaidyń turaqty jetkizilýine qoldaý kórsetýdi surady, dep habarlaidy dalanews.kz.
Qyrǵyzstannyń Energetika ministrliginiń málimetinshe, resmi saýaldar Qazaqstan, Resei, Belarýs, Ázerbaijan, Ózbekstan jáne Túrikmenstannyń tiisti organdaryna joldanǵan. Sonymen qatar bilik janarmai jetkizý baǵyttaryn ártaraptandyrý jáne halyqaralyq yntymaqtastyqty keńeitý boiynsha kelissózder júrgizip jatyr.
Vedomstvonyń habarlaýynsha, Qyrǵyzstan munai ónimderiniń shamamen 90-95 paiyzyn Reseiden importtaidy. Sondyqtan álemdik energetika naryǵyndaǵy ózgerister, geosaiasi ahýal jáne logistikalyq qiyndyqtar eldiń ishki janarmai naryǵyna tikelei áser etedi.
Energetika ministrligi qoldanystaǵy kelisimsharttar boiynsha jetkilikti janarmai qory bar ekenin málimdegenimen, eldegi birqatar janarmai quiý beketterinde AI-95 jáne AI-98 markaly benzin tapshy bolyp otyr.
Jaǵdaidy turaqtandyrý úshin Qyrǵyzstan ministrler kabineti 25 mamyrdan bastap janarmaidy tasymaldaýmen jáne satýmen ainalysatyn kompaniialarǵa sýbsidiia engizdi. Bul shara 30 qyrkúiekke deiin kúshinde bolady.
Sonymen qatar bilik otandyq óndiristi ulǵaitýǵa basymdyq berip otyr. «Djýnda» munai óńdeý zaýytyna ai saiynǵy benzin óndirisin qazirgi 24 myń tonnadan jyl sońyna deiin 50 myń tonnaǵa jetkizý tapsyryldy.
Budan bólek, memlekettik organdar janarmai naryǵyndaǵy jaǵdaidy kún saiyn baqylap, munai treiderlerimen jetkizý, logistika, baǵa belgileý jáne qor qalyptastyrý máseleleri boiynsha kelissózder júrgizip jatyr.
