Қырғызстан елдегі бензин тапшылығы мен Ресей импортына тәуелділікке байланысты Қазақстаннан және тағы бес мемлекеттен жанар-жағармайдың тұрақты жеткізілуіне қолдау көрсетуді сұрады, деп хабарлайды dalanews.kz.
Қырғызстанның Энергетика министрлігінің мәліметінше, ресми сауалдар Қазақстан, Ресей, Беларусь, Әзербайжан, Өзбекстан және Түрікменстанның тиісті органдарына жолданған. Сонымен қатар билік жанармай жеткізу бағыттарын әртараптандыру және халықаралық ынтымақтастықты кеңейту бойынша келіссөздер жүргізіп жатыр.
Ведомствоның хабарлауынша, Қырғызстан мұнай өнімдерінің шамамен 90-95 пайызын Ресейден импорттайды. Сондықтан әлемдік энергетика нарығындағы өзгерістер, геосаяси ахуал және логистикалық қиындықтар елдің ішкі жанармай нарығына тікелей әсер етеді.
Энергетика министрлігі қолданыстағы келісімшарттар бойынша жеткілікті жанармай қоры бар екенін мәлімдегенімен, елдегі бірқатар жанармай құю бекеттерінде АИ-95 және АИ-98 маркалы бензин тапшы болып отыр.
Жағдайды тұрақтандыру үшін Қырғызстан министрлер кабинеті 25 мамырдан бастап жанармайды тасымалдаумен және сатумен айналысатын компанияларға субсидия енгізді. Бұл шара 30 қыркүйекке дейін күшінде болады.
Сонымен қатар билік отандық өндірісті ұлғайтуға басымдық беріп отыр. «Джунда» мұнай өңдеу зауытына ай сайынғы бензин өндірісін қазіргі 24 мың тоннадан жыл соңына дейін 50 мың тоннаға жеткізу тапсырылды.
Бұдан бөлек, мемлекеттік органдар жанармай нарығындағы жағдайды күн сайын бақылап, мұнай трейдерлерімен жеткізу, логистика, баға белгілеу және қор қалыптастыру мәселелері бойынша келіссөздер жүргізіп жатыр.
