Qazaqstan Respýblikasynyń Prezidenti Qasym-Jomart Toqaevtyń eldiń tranzittik áleýetin odan ári damytý jónindegi tapsyrmasyn oryndaý sheńberinde Basqarma tóraǵasy Talǵat Aldybergenov bastaǵan «Qazaqstan temir joly» UK» AQ delegatsiiasy Qytai Halyq Respýblikasyna jumys saparymen baryp, 18 qarasha kúni «Qytai-Eýropa» temirjol marshrýtyndaǵy halyqaralyq yntymaqtastyqtyń ekinshi forýmyna qatysty, dep habarlaidy Dalanews.kz.
Forýmda QHR Memlekettik Keńesi premeriniń orynbasary Din Siýesian, Shansi provintsiiasynyń gýbernatory Chjao Gan, Qytaitemir joldarynyń basshysy Go Chjýsiýe jáne 40-tan astam eldiń úkimettik qurylymdarynyń basqada joǵary laýazymdy ókilderi sóz sóiledi.
Forýmda Transkaspii halyqaralyq kólikbaǵdaryn (THKB) damytýǵa, halyqaralyq yntymaqtastyqty nyǵaitý jáne jahandyq jetkizilimderdiń turaqtylyǵyn qamtamasyz etýdegi temirjol kóliginiń rólin nyǵaitý máselelerine erekshe nazar aýdaryldy.
Forým aiasynda CRCT kompaniiasy arqyly Qytai temir joldaryn «MIDDLE CORRIDOR MULTIMODAL Ltd.» - Qazaqstan, Ázirbaijan jáne Grýzin temir joldarynyń birlesken kásipornyna qosý týraly kelisimge qol qoiyldy.
Forýmda sóilegen sózinde Talǵat Aldybergenov Qazaqstan men Qytai kóshbasshylary marshrýtty damytýǵa mańyzdy mán beretinin atap ótti. Buǵan deiin QR Prezidenti Qasym-Jomart Toqaev pen QHR Tóraǵasy Si Tszinpin óz sózderinde «Qytai – Ortalyq Aziia – Eýropa» baǵyty boiynsha bailanystardy nyǵaitý memleketterdiń ortaq strategiialyq múddelerine sáikes keletinin jáne turaqty saýda men ósý úshin jańa múmkindikter ashatynyn atap ótken edi. 
Máselen, Qazaqstan men Qytai arasyndaǵy tasymaldar keiingi 10 jylda 4,5 eseden astamǵa ósti. 2025 jyly 35 mln tonnaǵa jetedi dep kútilýde (10 aida 29 mln tonnadan astam tasymaldanǵan, bul ótken jyl deńgeiinen 11% joǵary).
Lianiýngan, Qorǵas, Sian jáne basqa da kólik toraptaryndaǵy Qazaqstan men Qytaidyń kooperatsiialyq jobalary turaqty ósýdi kórsetedi. Konteinerlik tasymaldar onjyldyqta 5 eseden astam ulǵaidy jáne 1,4 mln JFB-dan asty.
THKB boiynsha da oń dinamika saqtalýda: biylǵy jyldyń 10 aiynda konteinerlik poiyzdar sany 12% ósti. Jiberý boiynsha kóshbasshy Sian qalasy boldy – jalpy kólemniń 46%, 16 myńnan astam JFB.
Ósip kele jatqan suranysty qanaǵattandyrý úshin Qazaqstan temirjol infraqurylymyna belsendi investitsiia salyp otyrǵanyn atap ótý qajet. 5 myń km joldyń qurylysy men jańǵyrtylýy júrgizilýde, bul aldaǵy jyldary QHR shekarasynda ótkizý qabiletin jylyna 100 mln tonnaǵa deiin arttyrýǵa múmkindik beredi.
