Búgin Ortalyq sailaý komissiiasynyń otyrysynda Qazaqstanda Quryltai depýtattarynyń sailaýyna baiqaý júrgizýge qansha halyqaralyq baiqaýshynyń akkredittelgeni týraly aityldy, dep habarlaidy dalanews.kz.
OSK Tóraǵasynyń orynbasary Muhtar Erman aǵymdaǵy jyldyń 1 shildesinde Qazaqstan Respýblikasynyń Quryltaiy depýtattarynyń sailaýyna halyqaralyq baiqaý institýtyn ashý týraly sheshim qabyldanǵanyn atap ótti. Syrtqy ister ministrligi men Ortalyq sailaý komissiiasy sailaýdy baiqaýǵa qatysý úshin birqatar memleketter men halyqaralyq uiymdarǵa tiisti shaqyrýlar joldaǵan.
«Búgingi tańda Ortalyq sailaý komissiiasyna akkreditteý úshin 3 halyqaralyq uiym men 4 shet memlekettiń 60 baiqaýshysynyń kandidatýrasy usynyldy. Atap aitqanda, TMD baiqaýshylar missiiasynan - 4 adam, TMD-ǵa qatysýshy memleketterdiń Parlamentaralyq Assambleiasynan - 19 adam, EQYU DIAQB baiqaýshylar missiiasynan - 32 baiqaýshy, sondai-aq Maldiv Respýblikasy tarapynan 2 kandidatýra, onyń ishinde osy eldiń Sailaý komissiiasy tóraǵasynyń orynbasary usynyldy. Budan bólek, Astanada akkredittelgen diplomatiialyq korpýstyń dýaieni bolyp tabylatyn Palestinanyń Qazaqstandaǵy Elshisi, Venesýelanyń Qazaqstandaǵy Elshisi jáne Vengriianyń Qazaqstandaǵy ýaqytsha senimdi ókili de akkreditteldi. Akkreditteýge qatysty usynystar kelip túsýine qarai baiqaýshylar týraly málimetter jańartylyp otyrady», - dedi Muhtar Erman.
Otyrys qorytyndysy boiynsha Ortalyq sailaý komissiiasynyń músheleri shet memleketter men halyqaralyq uiymdardyń baiqaýshylaryn akkreditteý týraly qaýly qabyldady.
