Quryltai depýtaty Dana Medeýovanyń esimi keiingi kúnderi qoǵam nazaryn aýdardy. Ulysmedia.kzmálimetinshe, ol prezident Qasym-Jomart Toqaevtyń týysy. Osyǵan bailanysty onyń depýtat bolyp sailanýy qoǵamda túrli pikir týǵyzǵan, dep habarlaidy dalanews.kz.
Basylym bul másele jóninde Quryltai depýtaty Aidos Sarymnyń pikirin suraǵan. Onyń aitýynsha, Dana Medeýovanyń depýtat bolýy Konstitýtsiia talaptaryna qaishy emes.
Sarym ár azamattyń saiasi partiiaǵa múshe bolýǵa, sailaýǵa qatysýǵa jáne sailanýǵa quqyǵy bar ekenin atap ótti. Onyń sózinshe, prezidenttiń jaqyn týystarynyń memlekettik organdar men kvazimemlekettik sektordaǵy basshylyq qyzmetterde bolýyna qatysty shekteý depýtattyq mandatqa tikelei qatysy joq.
"Menińshe, munyń Konstitýtsiiaǵa eshqandai qaishylyǵy joq. Negizgi zańǵa sáikes, ár azamat qoǵamdyq, saiasi jáne basqa da qyzmetpen ainalysýǵa, saiasi partiiaǵa múshe bolýǵa, sol partiia atynan Parlamentke nemese Quryltaiǵa sailanýǵa quqyly. Birinshiden, osyny atap ótý kerek. Ekinshiden, Memleket basshysy áý bastan-aq prezidenttiń jaqyn týystary memlekettik organdar men kvazimemlekettik sektorda basshylyq qyzmet atqarmaýy kerek ekenin aitty. Ózderińiz bilesizder, ol birneshe týysyn memlekettik qyzmetten jáne kvazimemlekettik sektordaǵy laýazymdarynan bosatty. Jalpy, prezident bul ustanymynan bas tartyp otyrǵan joq", – dedi Aidos Sarym.
Onyń málimetinshe, Dana Medeýova depýtat bolǵanǵa deiin qoǵamdyq jáne qaiyrymdylyq jumystarmen ainalysqan, kitap shyǵarý isine de atsalysqan.
"Eń áýeli, bir nárseni naqtylap alǵan jón. Quryltai depýtatynyń mandaty taǵaiyndalmaidy. Ony bir adamnyń jeke sheshimimen alý múmkin emes. Depýtatty halyq daýys berý arqyly sailaidy.
Dana Medeýovaǵa kelsek, ol buǵan deiin qaiyrymdylyqpen, qoǵamdyq jumystarmen jáne kitap shyǵarýmen ainalysqan. Sondyqtan "Ádilet" partiiasynyń sailaýda jeńiske jetýine onyń da belgili bir úlesi boldy dep oilaimyn. Qazir ol Qorǵanys jáne qaýipsizdik komitetiniń quramynda jumys isteidi. Onyń halyqaralyq media salasynyń mamany ekenin de atap ótken jón. Dana Medeýova diplomatiialyq qyzmet atqarǵan, halyqaralyq qatynastar men diplomatiia salasynda mol bilimi men tájiribesi bar. Sondyqtan, menińshe, munda bári zań aiasynda. Konstitýtsiiaǵa da, moraldyq qaǵidattarǵa da qaishy keletin eshteńe joq. Eger qoǵamda suraqtar týyndasa, olarǵa jaýap berip, túsindirý kerek", – dedi Aidos Sarym.
Sondai-aq depýtat jańa áriptesi týraly aqparattyń az bolýy qoǵamdaǵy suraqtardyń kóbeiýine áser etken bolýy múmkin dep esepteidi. Onyń sózinshe, Quryltai saitynda depýtattardyń ómirbaiany, bilimi, ǵylymi eńbekteri jáne qyzmeti týraly málimetter jariialanýy tiis.
Sarymnyń aitýynsha, Dana Medeýova – professor, ǵylym doktory. Ol toǵyz jyldan astam ýaqyt basshylyq qyzmet atqarǵan. Sonyń ishinde Almatydaǵy Abai atyndaǵy Qazaq ulttyq pedagogikalyq ýniversitetinde prorektor bolǵan.
Aidos Sarym jańa depýtatty tek prezidentpen týystyq bailanysy arqyly baǵalaý durys emes degen pikir bildirdi. Onyń paiymynsha, saiasi tulǵalardyń qyzmetine olardyń naqty eńbegi, bastamalary men qoǵamǵa usynǵan ideialary negizinde baǵa berilýi kerek.
