Qurmanǵazy aýdanynda mal belgisiz aýrýdan qyrylýda
Qurmanǵazy aýdanynda maldyń qandai aýrýdan qyrylyp jatqandyǵyn turǵyndar túsine almai álek. Qorasyndaǵy múiizdi maldyń aidyń-kúnniń amanynda ólip jatqanynan shoshynǵan aýdan turǵyndary aýrý syrttan keldi degen boljam aitýda.
Turǵyndar aýrýdyń Daǵystannan shyqqanyn alǵa tartýda. Al onyń Atyraýǵa qalai kelgenin eshkim bilmeidi. Dese de naqty qandai aýrý ekendigin mamandardyń ózi ajyrata almai jatyr.
Aýdan basshysynyń sózine sensek, Astana men Almaty qalasynan kelgen mamandar belgisiz aýrýǵa shaldyqqan múiizdi iri qaradan synama alyp ketken. Alaida, áli qorytyndy sheshim shyǵarmapty. Sondaqtan ákim aýdan boiynsha karantin jariialai almai otyrǵanyn alǵa tartty.
– Karantin maldyń aýrýynyń túri anyqtalmaiynsha jariialanbaidy. Biz shekteý jariialaǵymyz kelip otyr. Biraq qolymyzǵa synmanyń naqty nátijesi tigen joq. Bir aptanyń kóleminde keledi degen. Kútýdemiz, – deidi aýdan ákimi Biboz Shaiahmetov.
Malmen ǵana kún kórip, qoradaǵy iri qaralaranyń amandyǵyn tilegen halyq barynan airylyp qalmas úshin qymbat dárilerdi satyp alyp, amaldaýǵa májbúr. Óz kezeginde aýdan basshysy da biýdjetten 1 million 930 myń teńge qarjy bólinip, kórshiles Batys Qazaqstan oblysynan dári-dármek aldyryp, belgisiz aýrýdyń aldyn alyp otyrǵandaryn rastady.
Emi tabylmai esinen tanyp ólgen múiizdi iri qaralardyń ólekseleri aýdan syrtyndaǵy arnaiy orynǵa tastalyp, órtelinip jatyr. Kúni búginge deiin qyrylǵan maldyń sany qyryqqa jetken.
Asantemir Qarshyǵauly, Ǵani Saǵyndyqov
