Qurylys kompaniialaryna salǵan turǵyn úi keshenderiniń sapasyna bes jylǵa (qazir eki jyl) kepildik berýi mindettelmek. Osyndai normany qarastyratyn jańa Qurylys kodeksiniń jobasyn búgin Májilis depýtattary birinshi oqylymda maquldady, dep habarlaidy Dalanews.kz.
Bul shara qoldanylatyn qurylys materialdarynyń sapasyn, jobany ázirleý protsesin, tapsyrys berýshi men merdigerdiń jaýapkershiligin jaqsartyp, tutastai alǵanda salynǵan ǵimarattardyń ónimdiligin arttyrady dep kútiledi.
Bul rette depýtattar qurylymǵa, shatyrǵa, qasbetke bólek 10 jyl kepildik merzimin belgileýdi usynyp otyr. Bul usynys ekinshi oqylymda qarastyrylatyn bolady.
Sonymen qatar Májilis depýtattary men qoǵam belsendileriniń usynysy boiynsha jańa Qurylys kodeksiniń jobasynda múmkindigi shekteýli jandar, qart adamdar, jalpy barshaǵa kedergisiz jáne jaily jaǵdai jasaýdyń mindetti talaptary belgilenip kórsetilgen. Bul, negizinen, turǵyn úiler men qoǵamdyq ǵimarattarǵa, kólik toraptaryna jáne avtoturaqtarǵa qatysty bolyp keledi. Buǵan turǵyn úi keshenderi aýdandaryndaǵy jáne mekemelerdegi ashyq avtoturaqtarda qozǵalys múmkindigi shekteýli kólikter úshin oryndar bólý jaiy da jatady.
Sonymen qatar aýmaqtardyń bolashaqtaǵy damýyn eskere otyryp, injenerlik infraqurylym obektilerin jobalaý men ornalastyrýǵa, sondai-aq qýattandyrý stantsiialaryn kólik jáne energetikalyq júielerge biriktirýge mindetti talaptar qarastyrylady.
Buǵan deiin Májilis depýtat Ashat Aimaǵambetov jańa Qurylys kodeksiniń shiki tustaryn tizbelep bergen bolatyn.
