Ǵylym jáne joǵary bilim ministri Saiasat Nurbek QBTÝ-dyń memleketke ótýine qatysty sot protsesi týraly pikir bildirdi, dep habarlaidy Dalanews.kz.
«Birinshi jáne ekinshi sot instantsiialary ótti, endi konstitýtsiialyq shaǵym ǵana qaldy. Meniń túsinýimshe, alda qarastyrý kezeńi tur, al túpkilikti sheshimdi Joǵarǵy sot qabyldaidy», – dedi ol.
Saiasat Nurbek bul másele boiynsha tolyq pikir bildire almaitynyn aitty, sebebi Ǵylym ministrligi bul sot protsesine qatysy joq. Endi tek sot sheshimin kútý ǵana qaldy.
«Maǵan belgili málimet boiynsha, birinshi instantsiianyń sheshimi kúshinde qaldyryldy. Al ekinshi instantsiianyń sheshimine sáikes, múlik memleketke qaitarylýy tiis», – dedi ol.
Eske salaiyq, buǵan deiin eks-prezident Nursultan Nazarbaevtyń ortanshy qyzy Dinara Qulybaeva men onyń jubaiy, oligarh Timýr Qulybaev Qazaqstan-Britan tehnikalyq ýniversitetine (QBTÝ) ielik etpeitin bolǵanyn habarlaǵan edik.
Qarjy ministrliginiń qarjylyq eseptilikti saqtaý qorynan alynǵan málimetke sáikes, ýniversitettiń negizgi aktsioneri ózgergen.
"Aktsionerlerdiń quramy týraly jáne emitenttiń daýys beretin aktsiialarynyń on jáne odan da kóp paiyzyn ielenetin aktsionerlerdiń quramynda ózgeris bar. QBTÝ-dyń jańa iesi — "Qaitarylǵan aktivterdi basqarý kompaniiasy" JShS", — delingen resmi qujatta.
Qujatqa sáikes, bul ózgeris 27 aqpanda oryn alǵan.
Eske salaiyq, 11 qańtar, senbi kúni keshke Almatydaǵy Qazaqstan-Britan tehnikalyq ýniversitetiniń (QBTÝ) ǵimaraty órtene bastady. Órt 120 sharshy metr aýmaqty sharpydy. Aqyrynda Tótenshe jaǵdailar ministrligi qaladaǵy eń kóne ǵimarattardyń birindegi órtti sóndire aldy. Bul ǵimarattyń teń ieleriniń biri – Qazaqstannyń burynǵy prezidenti Nursultan Nazarbaevtyń qyzy Dinara Qulybaeva.
2024 jyldyń aqpanynda bes.media basylymy Almaty prokýratýrasynyń «QazMunaiGaz» (QMG) jáne Nursultan Nazarbaevtyń bilim berý qory (NNEF) ústinen sotqa aryzdanǵanyn habarlady. Másele mynada: 2018 jyly QMG buǵan deiin óz menshiginde bolǵan ýniversitetti aýktsion arqyly osy qorǵa satqan. Alty jyl ótken soń, prokýratýra bul kelisimdi jaramsyz dep tanýdy talap etti, sebebi «kompaniiany memleketke tapsyrý kezinde shyǵyn keltirilgen» dep málimdedi («QazMunaiGaz» – ulttyq kompaniia). Nursultan Nazarbaevtyń bilim berý qory ýniversitetti 11,3 mlrd teńgege satyp alǵan. Keiin prokýratýra bul mámile kezinde memleketke 11 mlrd teńge kóleminde zalal kelgenin eseptegen. Ol kezde de, qazirgi ýaqytta da Qordyń quryltaishylarynyń biri – Nursultan Nazarbaevtyń ortanshy qyzy Dinara Qulybaeva.
eGov.kz málimetine sáikes, QBTÝ-dyń bir ǵana quryltaishysy bar, biraq onyń naqty kim ekeni kórsetilmegen. QBTÝ-dyń 2023 jyldyń sońyndaǵy sońǵy eseptiliginde ýniversitettiń jalǵyz aktsioneri «NNEF» – Nursultan Nazarbaevtyń bilim berý qory ekeni aitylǵan. Bul Qordyń áli de QBTÝ-dyń quryltaishysy ekenin bildiredi.
Qazirgi ýaqytta Nursultan Nazarbaevtyń bilim berý qorynyń úsh quryltaishysy bar: Dinara Qulybaeva, Galina Samarskaia jáne Asqar Nurpeiisov.
