Sonyń ishinde Másimov qabyldatqan zańdardyń murty buzylmai tur. Sonyń biri - «Áleýmettik-kásipkerlik korporatsiialar týraly» zań.
"Áleýmettik-kásipkerlik korporatsiia - onyń jalǵyz quryltaishysy Qazaqstan Úkimeti bolyp tabylatyn aktsionerlik qoǵamnyń uiymdyq-quqyqtyq nysanynda qurylǵan zańdy tulǵa.
Ony 2008 jylǵy 30 maýsymdaǵy №660 Qaýlysy arqyly sol kezdegi Premer-Ministr K. Másimovtiń qabyldatqany atalǵan «Áleýmettik-kásipkerlik korporatsiialar týraly» Zańynyń basynda jazýly tur.
Aýyl azamattary kooperativ quryp, Úkimet bólgen qarajattyń igiligin kóreiin dese, ol kooperativtiń quramyna osy áleýmettik-kásipkerlik korporatsiia kiredi de, 49 paiyzǵa deiingi úleske ie bola ketedi. Oǵan osy Zańynyń 14-babynyń 2-tarmaǵy jol beredi.
Sóitip, Úkimet aýyl sharýashylyǵyn órkendetý úshin oń qolymen bergen qarajatyn áleýmettik-kásipkerlik korporatsiia arqyly sol qolymen qaitaryp alýda", – deidi Aýyt Muqibek.
Onyń aitýynsha Álihan Smaiylov bul zańnyń kezinde qandai maqsatpen qabyldanǵanyn bilmeidi emes. Bile tura, jemqorlyqqa dańǵyl jol ashyp qoiǵan osy zańdy joiýǵa nemese ózgertýge qulyqsyz. Ózgertý bylai tursyn, halyqtyń tabysyn arttyrý maqsatynda Toqaev tapsyrmasymen Jambyl oblysynda jolǵa qoiylǵan pilottyq joba dál osy Zańǵa súienip júrgizilýde.
"Demek, «Áleýmettik-kásipkerlik korporatsiialar týraly» zań Smaiylovtyń qolaiyna jaqty degen sóz", - deidi qoǵam belsendisi.
Aita ketelik, buǵan deiin Májilis depýtaty Rinat Zaiytov prezident tapsyrmalary ary ketse, 30-40 paiyzǵa ǵana oryndalyp jatqanyn aitqan.
"Eger, onyń sózi shyn bolsa, onda oǵan kezinde Timýr Qulybaev pen Kárim Másimovtiń yqpalymen jobasy jasalyp, burynǵy Parlament depýtattary bekitip bergen, qazir de bir árpi ózgermei qoldanysta turǵan osy «Áleýmettik-kásipkerlik korporatsiialar týraly» zań jáne osy sekildi eski normativtik qujattar kedergi jasap otyr.
Toqaev elimizdiń ekonomikalyq damý máseleleri jónindegi Úkimet keńesinde sóilegen sózinde, 2019-2021 jyldary ónim óńdeýge berilgen sýbsidiiany synǵa salǵan.
"Bul qarajattyń teń jartysy sýbsidiia alam deýshilerdiń 10 paiyzynyń ǵana qolyna tigen. Sýbsidiia alǵan keibir pysyqailar óndiristi órkendetýdiń ornyna biýdjet qarjysyn qaltasyna basyp, shalqyp ómir súrgen. Al qarapaiym sharýalar úshin sýbsidiia alý – qiiamettiń qiyny» - degen edi prezident.
Osy keleńsizdikti týdyryp otyrǵan da sol baiaǵy «Áleýmettik-kásipkerlik korporatsiialar týraly» zań", – deidi Aýyt Muqibek.
Belsendiniń pikirinshe shetke zańsyz shyǵarylǵan aqshaǵa para-par memleket qarajaty (dittegen jerine jetpei) kóz aldymyzda tonalyp jatyr.
"Ony sheshýdiń birden-bir joly – Jambylda jolǵa qoiylǵan aýyl sharýashylyǵy kooperativterine beriletin ósimi 2.5 paiyzdyq nesie sekildi jeńildetilgen kómek aqshalardy kimderge berýdi Áleýmettik-kásipkerlik korporatsiia arqyly emes, aýyldyq okrýg ákimderi men alda halyqtyq sailaý arqyly qurylatyn Aýyldyq keńestiń bekitýi arqyly sheshilýi tiis.
Qysqasy, Áleýmettik-kásipkerlik korporatsiialardyń qyzmetin aýyldyq okrýg ákimderi men alda halyqtyq sailaý arqyly qurylatyn Aýyldyq keńestiń quzaretine bergen durys. Osy jolǵy Joldaýda osy másele eskeriler dep úmittengen edim. Ókinishke orai, úmitim aqtalmady. Usynysymnyń Toqaevqa jetpegeni belgili boldy.
Demek, Prezident Ákimshiligi men Úkimettiń Qulybaev pen Másimov qurǵan jemqorlyq shemasyn buzýǵa qulqy joq degen sóz", – deidi.
