Prezident memlekettik nagradalar, joǵary áskeri jáne arnaýly ataqtar, synyptyq shender tapsyrý rásimine qatysyp, qazirgi tańda áskerdiń qanshalyq mańyzdy ekenin aitty, - dep habarlaidy Dalanews.kz.
Memleket basshysy – Qazaqstan Qarýly Kúshteriniń Joǵarǵy Bas qolbasshysy Qasym-Jomart Toqaev jiynǵa qatysýshylardy Otan qorǵaýshy kúnimen jáne alda kele jatqan Jeńis kúni merekesimen quttyqtap, osy eki meiram jaýyngerlik dástúrdiń sabaqtastyǵyn pash etetinin, batyr babalarymyzdyń dańqty jolyn qazir óskeleń urpaq jalǵastyryp kele jatqanyn atap ótti.
"Búginde aibyndy armiiamyz – eldegi tutastyq pen tynyshtyqtyń myqty qalqany. Qýatty áskerimiz beibitshilik pen berekeli ómirdi qas qaqpai kúzetip tur. Olar qai kezde de qasterli Otanymyzdy qorǵaýǵa daiyn. Erlik maidanda ǵana jasalmaidy. Erlikke beibit zamanda da oryn bar. Biyl biz sońǵy 80 jyldaǵy eń joiqyn tasqynǵa tap boldyq. Elge qater tóngen sátte sarbazdarymyz aldyńǵy shepten tabyldy. Ulttyq ulan, Ishki ister ministrligi, Ulttyq qaýipsizdik komiteti, Tótenshe jaǵdailar ministrligi jáne Memlekettik kúzet qyzmetiniń jeke quramy antqa adal bolýdyń úlgisin kórsetti. Alapat tasqynǵa tótep berý úshin 9 myńnan astam áskeri qyzmetshi jumyla eńbek etti. Myńnan astam tehnika jetkizildi. Syn saǵatta halqymyzdyń asyl qundylyqtary anyq baiqalady. Osy oraida Soltústik Qazaqstan oblysynda apatqa qarsy kúresken 300 sarbazdyń eńbegin erekshe atap ótkim keledi. Olar kúni-túni bógen salyp, qalany qarǵyn sýdan qutqarýǵa atsalysty. Jergilikti turǵyndar bul sarbazdarǵa airyqsha riza boldy, olardy zor qurmetpen shyǵaryp saldy. Mine, halyq pen armiianyń myzǵymas tutastyǵy degenimiz – osy. Mundai mysaldar az emes", – dedi Prezident.
Qasym-Jomart Toqaev Jeńis kúnin jaqyndatýǵa atsalysqan maidangerler men tyl eńbekkerlerine árqashan qurmet kórsetiletinin aitty. Osy rette ardagerlerge merekege orai jyl saiyn qosymsha tólemaqy beriletinin, al biyl onyń kólemi úsh million teńgege deiin óskenin jetkizdi. Sonymen qatar, óziniń bastamasymen biyldan bastap "Aibyn" ordeniniń úsh dárejesi dańqty batyrlarymyz – Saǵadat Nurmaǵambetovtiń, Baýyrjan Momyshulynyń jáne Raqymjan Qoshqarbaevtyń atymen atalatynyn eske salyp, ult perzentteriniń batyldyǵy men batyrlyǵy búgingi jáne bolashaq urpaq úshin úlgi-ónege bolatynyna nazar aýdardy.
Memleket basshysynyń aitýynsha, geoosaiasi turaqsyzdyq beleń alǵan qazirgi jaǵdaida myqty ári daiyndyǵy saqadai sai áskerdiń mańyzy aitarlyqtai arta tústi.
"Bizdiń áskeri qyzmetshilerimiz BUU aiasyndaǵy túrli bitimgerlik operatsiialarǵa qatysyp, ózderiniń kásibiligi men joǵary deńgeidegi jaýyngerlik mashyǵyn kórsetip keledi. Jýyrda Qazaqstan Golan jotalaryndaǵy missiiasyn derbes oryndaý jónindegi Birikken Ulttar Uiymynyń mandatyna alǵash ret ie boldy. Sońǵy jyldary álem elderiniń áskeri qýaty týraly reitingtegi ornymyz edáýir jaqsardy. Bul áskerimizdiń daiyndyǵy joǵary ekenin ári úilesimdi áreket etetinin bildiredi. Qazaqstan jer-jahanǵa ózin beibit el retinde tanytty. Biz barlyq memleketpen dostyq qatynas ornattyq. Kez kelgen shielenisti syndarly dialog arqyly sheshý kerek dep esepteimiz. Biraq arqany keńge salyp, qamsyz otyrýǵa bolmaidy. Qýatty áskerimiz túrli qaterge saqadai sai turýǵa tiis. Myqty ásker – eldiktiń tiregi", – dedi Prezident.
Qasym-Jomart Toqaev Qazaqstannyń aibyndy armiiasy kásibi turǵydan bilikti ári zamanǵa sai ozyq bolýy úshin Qarýly Kúshterimizdi odan ári nyǵaitý jumystary jalǵasatynyn jetkizdi.
"Kúni keshe ǵana elimizde jańa aviatsiia bazasy ashyldy. Bul – ulttyq qorǵanys júiesiniń áleýeti arta tústi degen sóz. Biz armiianyń bedelin kóterýge airyqsha mán beremiz. Otan qorǵaý – barshamyzǵa ortaq paryz. Muny, ásirese, óskeleń urpaq tereń túsingeni abzal. Memleket jas sarbazdarǵa jan-jaqty qoldaý kórsetip jatyr. Olarǵa arnaiy bilim granttary bóline bastady. Nesieni óteý merzimi keiinge shegerildi. Endi armiiada júrip, naqty mamandyq alýǵa bolady. "Er jigitke jarasar, qolyndaǵy naizasy" dep áigili Buqar jyraý batyrlyq pen erlikti erekshe dáriptegen. Shyn máninde, ásker – memlekettiń asa mańyzdy simvoly. Men sarbazdarymyzdyń jaýyngerlik rýhy joǵary bolǵanyn maqtan etemin", – dedi Memleket basshysy.
