Áielin óltirgeni úshin 24 jylǵa qamaýǵa alynǵan Qýandyq Bishimbaev eń joǵary qaýipsizdik mekemesinde jazasyn ótep jatyr, - dep habarlaidy Dalanews.kz.
CMN.KZ málimetinshe, Bishimbaev ázirge jumysqa ornalaspaǵan. Bul týraly Qylmystyq atqarý júiesi komitetindegiler redaktsiianyń resmi saýalyna bergen jaýabynda aitqan.
Koloniiada ulttyq ekonomikanyń eks-ministri úshin qolaily bos oryn áli bos emes.
"Bos jumys oryndarynyń bolmaýyna bailanysty Qýandyq Bishimbaev jumysqa turmaǵan. Sottalǵan adamnyń kún tártibi QAJ mekemeleriniń ishki tártip erejeleriniń jáne qoldanystaǵy Qylmystyq-atqarý zańnamasynyń talaptaryna sáikes saqtalady", - dep habarlady vedomstvo ókilderi.
Eske salaiyq, buǵan deiin Ishki ister ministrligi eks-ministr Qýandyq Bishimbaev koloniiada qandai jumys istei alatynyn aitqan bolatyn.
Bul týraly IIM qylmystyq-atqarý júiesi komitetiniń tóraǵasy, ádilet polkovnigi Teńizjan Jánibekov aitty.
"Onyń jumys isteýine qatysty: óndiristik aimaqtarda túrli jumys bar. Ol "Eńbek" Respýblikalyq memlekettik kásiporynda mysaly aǵash, metall óńdeý salasyna jumysqa ornalasa alady. Qai jerde bos oryn bolsa sol jerge bara alady.
Bul máseleni jumyspen qamtý bólimi sheshedi, kelgennen keiin 15 kún karantinde bolady. Biz ony zertteimiz, odan ári tárbie jumysy júrgiziledi. Psihologtar basqa tutqyndarmen jumys istegendei Bishimbaev pen de jumys isteidi", - deidi Jánibekov.
26 maýsymda Qýandyq Bishimbaev pen Baqytjan Baijanovqa qatysty qylmystyq istiń apelliatsiialyq sot otyrysy bolǵan edi. Alaida olardyń apelliatsiialyq ótinishi qanaǵattandyrylmady.
Qýandyq Bishimbaev 24 jylǵa, inisi Baqytjan Baijanov 4 jylǵa sottalǵan bolatyn.
