Qazaqstan Respýblikasynyń Tuńǵysh Prezidenti – Elbasy Nursultan Nazarbaev óz erkimen Memleket basshysy ókilettigin toqtatty.
Bul taǵdyrly sheshim jahandyq deńgeide, tarihi aýqymda tanylǵan saiasi qairatkerdiń kemeńgerligi men parasattylyǵyn álemge taǵy da tanytty, moiyndatty. Ult kóshbasshysy is júzinde táýelsiz eldegi saiasi basqarý men sabaqtastyqtyń múlde jańa, ozyq úlgisin jasap berdi.
Meniń de Prezident retindegi negizgi ustanymym men ómirlik kózqarasym osy baǵyttan aýytqymaidy.
Eldiń órkendeý kepildigi memleketshildik pen dástúr sabaqtastyǵynda jáne oǵan degen qurmet pen adaldyqta jatyr. Onsyz eshqashan turaqtylyq ta, damý da bolmaidy.
Ekinshi ustanymym – ádilettilik. Bul jalpyadamzattyq ári dala demokratiiasynan bastaýyn alatyn, ata-babamyzdan daryǵan, ejelden qanymyzǵa sińgen qundylyq bolatyn. Ony joǵaltyp alý adamzat úshin de, ult úshin de ózin-ózi joǵaltyp alýmen birdei.
Ádilettilik saltanat qurmaǵan qoǵamda tek qaishylyq, qiynshylyq, quldyraý ústemdik etetini belgili.
Sondyqtan ádiletsizdikpen memleket, qoǵam, ár adam kún saiyn, birigip kúresýimiz kerek. Halqymyz aitqandai, «Ádilet joly – aýyr jol», biraq aýyr bolsa da odan týra jol joq.
Úshinshi ustanymym – tek alǵa basý, damý jolymen júrý. Ózderińiz bilesizder, biz ómir súrip otyrǵan dáýirdiń tabiǵaty myń qubylmaly. Jahandyq básekelestik jaǵdaiynda múddemizdi qorǵaýǵa, maqsatymyzǵa jetýge umtylmasaq, jedel alǵa baspasaq kóp nárseden utylarymyz anyq.
Myna dáýir erkelikti, jalqaýlyq pen masyldyqty, nemqurailyqty kótermeidi.
Tórtinshi ónerkásiptik revoliýtsiia kezeńinde, joǵary tehnologiialyq, tsifrlyq keńistikte jahandyq damýdan on jyl artta qalsaq, júz jyl onyń ornyn toltyra almaitynymyzdy esten shyǵarmaiyq.
Elbasynyń dana sheshiminiń arqasynda bilik sabaqtastyǵy eshbir dúrbeleńsiz, shielenissiz júzege asty. Bul bolashaq úshin, memlekettiń turaqtylyǵy men udaiy damýy úshin jasalǵan biregei qadam ekenin umytpaýymyz kerek.
Bizdiń endigi mindetimiz – osy joldan, osy baǵyttan aýytqymai, tek alǵa basý, ósý, órkendeý. Keri ketsek, tarih ta, bolashaq urpaq ta bizdi keshirmeidi.
