"Qazaqstan temir joly" AQ basqarma tóraǵasy Nurlan Saýranbaev qansha jalaqy alatynyn aitty, - dep habarlaidy Dalanews.kz.
"Meniń jalaqym - 1 mln teńge. (Menedjerlerdiń) jalaqysy koeffitsientpen esepteledi.
Olarda baldyq júie bar. Sondyqtan menedjerlerdiń jalaqysy ártúrli. (Naqty) somany aita almaimyn. ("QTJ" AQ) basqarma múshelerine syiaqy tólenbeidi. Alaida jyldyń sońynda olarǵa bonýs tólenedi. Qazir naqty sandy aita almaimyn. Biraq biz bul derekti jariialaimyz", - dedi Nurlan Saýranbaev Senattyń jalpy otyrysynan soń jýrnalisterge.
Aita keteiik, Nurlan Saýranbaev 2021 jyldyń sáýirinde QTJ tóraǵasy bolyp taǵaiyndalǵan edi. Buǵan deiin Nurlan Saýranbaev Prezident Ákimshiliginiń memlekettik baqylaý jáne aýmaqtyq-uiymdastyrý jumysy bóliminiń meńgerýshisi qyzmetinen bosatylǵan bolatyn.
Eske salaiyq, kúni keshe Qarjy ministri Mádi Takiev jalaqysyn jariia etken bolatyn. Ministrdiń sózinshe, ol shamamen 1,5 million teńge jalaqy alady.
