"QTJ-Júk tasymaldary" JSHS-niń qyzmetinde zańbuzýshylyqtar anyqtaldy, dep habarlaıdy Dalanews.kz Básekelestikti qorǵaý jáne damytý agenttigine silteme jasap.
Agenttiktiń astanalyq departamenti kompanıaǵa qatysty tergeýdi aıaqtady. Onyń bastalýyna Qazaqstan men Qyrǵyzstannyń ulttyq ekspedıtorlar qaýymdastyqtarynyń, sondaı-aq birqatar kólik-ekspedıtorlyq kompanıalardyń shaǵymdary negiz bolǵan.
"Tergeý barysynda "QTJ-Júk tasymaldary" JSHS júk tasymaldaý josparlaryn kelisý kezinde affılıırlengen kompanıalarǵa – "KTZ Express" AQ men "KedentransServıs" AQ-ǵa basymdyq bergeni anyqtaldy. Osy arqyly jekemenshik ekspedıtorlyq uıymdardyń jumysyna kedergi keltirgen. Atalǵan áreketter "QTJ-Júk tasymaldary" JSHS tarapynan monopolıalyq jaǵdaıyn teris paıdalaný retinde baǵalandy", – dep túsindirdi vedomstvo.
22 tamyzda sot kompanıany 1,4 mlrd teńge aıyppul tóleýge mindettedi. Qarajat memleket kirisine túsedi.
15 qyrkúıekte apelásıalyq alqa birinshi satydaǵy sottyń sheshimin ózgerissiz qaldyrdy.
