Qazaqstanda temirjol arqyly júk tasymaldaý salasyna jeke kompaniialardy tartý josparlanyp otyr. Bul týraly Indýstriia jáne infraqurylymdyq damý ministrligine qarasty Temirjol jáne sý kóligi komitetiniń tóraǵasy Jánibek Taijanov málimdedi, dep habarlaidy Dalanews.kz.
Temirjol arqyly júk tasymaldaýdaǵy "Qazaqstan temir joly" ulttyq kompaniiasynyń monopoliialyq mártebesi sońǵy jyldary birneshe ret synǵa ilikken. Eger 2016 jyldan bastap jolaýshylar tasymalyna jeke operatorlar qatysýǵa múmkindik alsa, júk tasymaly búginde áli de QTJ-nyń airyqsha quzyrynda qalyp otyr.
Alaida, memleket bul baǵytta ózgeris jasaýǵa daiyn ekenin resmi túrde jariia etti.
"Ministrlik temirjol salasyn damytý tujyrymdamasyn ázirledi. Atalǵan tujyrymdama aiasynda júk tasymalyna jeke sektordy tartý bóliginde eki jeke operator pilottyq joba retinde jumys isteýde. Bizge 2027 jylǵa deiin ýaqyt berilgen. Osy eki jyl ishinde zańnamalyq bazany ázirlep, tehnologiialyq protsesterdi tolyq synaqtan ótkizemiz. Sodan keiin júk tasymaly naryǵynda jeke tasymaldaýshylar tolyqqandy jumys isteitin bolady", – dedi Taijanov OKQ brifinginde.
Komitet tóraǵasynyń aitýynsha, jekemenshik investorlar temirjol infraqurylymyn salý jobalaryna da tartylyp jatyr. Mysaly, Baqty – Aiagóz temirjol jelisiniń qurylysyna jeke investor qatysqan. Bul tájiribe memleket pen biznes arasyndaǵy seriktestiktiń tiimdiligin taldaýǵa múmkindik berip, bolashaqta ony zańnamalyq deńgeide keńeitýge negiz bolmaq.
Kontekst: Eger QTJ monopoliiasynan aiyrylsa, bul júk tasymaly naryǵynda básekelestikti arttyryp, baǵa men qyzmet sapasynyń jaqsarýyna alyp kelýi múmkin. Sonymen qatar, jekemenshik sektordyń tartylýy investitsiia kólemin ulǵaityp, infraqurylymdyq jobalardy jyldamyraq júzege asyrýǵa sep bolýy yqtimal.
