Qostanaida Eńbek jáne halyqty áleýmettik qorǵaý ministrligi men Oqý-aǵartý ministrliginiń eskertýlerine qaramastan, muǵalimder jaǵajaida kezekshilikke shyǵarylǵan, dep habarlaidy Dalanews.kz.
Qala ákimi Marat Júndibaev pedagogtardy sý aidyndaryn patrýldeýge tartýdy usynǵan. Bul sheshim sýǵa batyp qaitys bolǵan mektep oqýshysynyń qaiǵyly oqiǵasynan keiin qabyldanǵan. Bilim basqarmasy birden muǵalimderdiń sý aidyndarynyń mańynda kezekshilik etýge mindetti emes ekenin atap ótken. Buǵan deiin Eńbek jáne halyqty áleýmettik qorǵaý ministrligi de eskertý jasap, eger ákimniń tapsyrmasy oryndalsa, tiisti sharalar qabyldanatynyn málimdegen edi.
Degenmen muǵalimder kezekshilikke shyqqan. Fizika pániniń muǵalimi Erlan Úskenbaevtyń aitýynsha, ol byltyr da jaǵajaidy patrýldegen.
"Muǵalimderdiń demalysy 56 kún. Bul ýaqytta men demalysta bolmas edim, óitkeni oqýshylar emtihan tapsyrady. Al emtihanǵa qatyspaityn kúnderi jaǵajaiǵa shyǵyp, kezekshilik atqara alamyn. Bul úshin bizge demalys kúni beriledi, iaǵni basqa bir kúni jumysqa shyqpaimyn", – dedi ustaz.
Onyń aitýynsha, muǵalimder ár birneshe saǵat saiyn aýysyp otyrady. Kezekshilik úsh aýysymmen júrgiziledi: saǵat 11:00-den 21:00-ge deiin.
Qostanai ákimi Marat Júndibaev mundai jaǵdaida "Pedagog mártebesi týraly" zań buzylyp jatqan joq dep esepteidi.
"Bul jerde zań buzylǵan joq. Sebebi árbir muǵalim, pedagog nemese bilim berý salasynyń qyzmetkeri qosymsha tabys tabýǵa quqyly. Mysaly, jazǵy mektep janyndaǵy lagerde jumys isteý, sol siiaqty monitoringtik topqa qatysý. Bul jumys olardyń sýǵa túsýin talap etpeidi, olar tek jaǵalaýdy aralap shyǵady", – dep atap ótti qala basshysy.
Buǵan deiin Oqý-aǵartý ministrligi pedagogtardy mundai sharalarǵa tartý durys emes ekenin birneshe ret málimdegen bolatyn.
