Qostanailyq neirohirýrg Arqalyqtan kelgen naýqastyń ólimine sebepker boldy dep aiyptalýda. Marqumnyń týystary dárigerdiń operatsiiany mas kúiinde jasaǵanyn aitady. Dálel retinde olar operatsiiadan keiin birden túsirilgen beinejazbany usynǵan, dep habarlaidy Dalanews.kz.
«31 arna» málimetinshe, áleýmettik jelilerde taraǵan kadrlarda Qostanaidyń belgili neirohirýrgi beinelengen. Ol Arqalyqtaǵy naýqasqa operatsiia jasaý úshin arnaiy kólikpen kelgen. Alaida operatsiiadan keiin onyń minez-qulqynan kúmándanǵan marqumnyń týystary dáriger mingen kólikti toqtatqan. Olardyń aitýynsha, dáriger dál osyndai jaǵdaida olardyń ákesine operatsiia jasaǵan jáne sodan keiin qaladan tez ketýge tyrysqan. Biraq politseiler ony meditsinalyq tekserýge alyp ketken. Beinejazbada alkotester de kórinedi. Marqumnyń qyzynyń aitýynsha, dárigerdiń qylyǵy bastapqyda aǵasyna kúdik týdyrǵanymen, ol ony dárigerdiń minez ereksheligi shyǵar dep oilaǵan. Operatsiia bas súiegindegi gematomaǵa bailanysty jasalǵan. Al keiin, týystarynyń sózinshe, meditsinalyq qyzmetkerler olardyń kúdigin rastaǵan.
"Sol kezde operatsiia kezinde medbikeler onyń teńselip turǵanyn, áreń júrgenin baiqaǵan. Ol operatsiiany jasap bolǵan soń travmatologty shaqyrǵan. Travmatolog kelgen soń jara ashyq ekenin, ony tigý kerek ekenin aitqan. Keiin medbikeler onyń kabinetinde uiyqtap jatqanyn kórgen", – dedi marqumnyń qyzy Ásel Ospanova.
Beinejazbanyń operatsiiadan keiin birden túsirilgen-túsirilmegenin tergeý anyqtaidy. Al Qostanai oblystyq shuǵyl meditsinalyq járdem stantsiiasy dárigerdiń kólik tizgininde bolmaǵanyn habarlady.
